Inuusuttut illussaannik nutaamik nappaanersiorneq
Narsami inuusuttut illussaannik nutaarluinnarmik atoqqaartitsisoqangajalerpoq, taanna ukiuni arfineq pingasuni utaqqisaasimavoq. Tallimanngormat nappaanersiortoqarpoq
Sulisartut, entreprenørit, Teknikkimut Immikkoortortaqarfik kiisalu borgmesterimut tullersorti siulleq, Kiista P. Isaksen najuupput ileqquusumik immiaaqqamik taakkulu ilagisartagaat pølsit aappalaartut frikadellillu Inuilimeersut tamussersuutigalugillu najuussorneqarmata illoqarfimmi inuusuttut illussaat nutaaq napparnersiorneqarmat, taanna ungdomsklubbip pisoqqap eqqaani sanaartorneqartoq.
Borgmesterip tullersortaa oqalugiarnermini oqarpoq sipaarniartoqarnera pissutigalugu inuusuttut illussaat ukiuni arfineq pingasuni utaqqineqarsimasoq, inuusuttullu sinnerlugit nuannaarutiginerarpaa maanna naleqquttumik orniguttarfeqalersinnaalermata.
Immikkoortortaqarfimmi pisortaq, Flemming Grundsøe, Permagreen a/s, sanaartugassamik ingerlatsisuusoq, inuusuttut sinnerlugit nuannaarnerarpoq:
- Inuusuttut Kalaallit Nunaata siunissaraat. Sanaartukkallu siunissaq aamma peqataaffigissavaa, uagut katillugit lærlingit arfineq marluk sulisoraagut, taamaattumillu kalaallit inuusuttaasa ilinniartitaanerannik pingaaruteqartumik peqataalluta.
Inuusuttut illussaat 325 kvadratmeterit missiliorlugit angissuseqassaaq, naatsorsuutigineqarporlu 8,4 millionit koruuninik akeqarnissaa. Pilersaarutitigineqartutut januaarip naanerani 2012-mi piariissaaq, sanaartornerli ingerlalluangaarmat naatsorsuutigineqarpoq ukioq manna decembarimi atulernissaa.
Kommunip maanna suli aalajangiiffiginngilaa ungdomsklubbip pisoqqap sumut atorneqalernissaa, kisianni eqqartorneqartareerpoq atuarfimmi atuartut atuartinneqartarnerannut atorneqartalissasoq atuarfiup pisoqartaa nutarterneqalerpat.