Inuit pilluarnerpaajupput
Inuiaaat Masai-it aamma inuit ataatsimooruteqarput, tassa nunarsuatsinni inuiaat pilluarnerpaajugamik
Nunarsuatsinni inuiaat pilluarnerpaat - amerikamiut saqqummersittagaat Forbes naapertorlugu - tassaapput inuit aamma masai-it. Misissuisitsineq ingerlanneqarpoq USA-mi University of Illinoisimit. Inuit qaffasinnerpaatut inissinneqarput 80-imik naliliiffigineqarmata, masai-illu tulliullutik 79-imik nalilerneqarlutik.
Misissuisitsinerup takutippaa pilluarneq inuup nammineq naliliineranik aallaaveqartoq, inerniliivorlu pissutissaqanngitsoq inuit nuannaannginnissaannut.
Pilluarneq naliliffigineqarpoq inuit kiinamikkut isikkuat misissuiffigalugu, assersuutigalugu sølvinnattup aamma bronzennattup isikkui erseqqissumik assigiinngitsuusarput, taamatut allaaserisaqarpoq Forbes, aamma ilanngullugu allaaseraa pilluarnerup uuttortarnissaanut/naliliiffiginissaanut allat tunngaviusartut. Aningaasat, peqqinneq aamma upperisaq kisimik tunngaviuneq ajorput.
Professor Ed Diener University of Illinoisimeersoq ilisimaneqarpoq pilluarnermik misissuisartutut, Forbesimullu oqarpoq pilluarnissamut makku aqqutissaasartut: inuttut attaveqarfigisassarpassuit, taamaattumik kisimiittarnissamut piffissaq annikitsuinnaq atorneqartarluni, piffissaq annertooq inuit allat naapinnissaannut atorneqartarluni minnerunngitsumillu ikinngutit sammilluartarnissaannut piffissaqarfigineqarluni.
Koreamiut Neuropsykiatriske Association aamma Gallup Korea Koreami inuit 1.006-it aperai pilluarnertik naliliiffigeqqullugu. Agguaqatigiissillugu 68,1 pointiuvoq, pointimik ataatsimik 2006-imi assinganik misissuisitsinermit annikinnerulluni.
Forbesimi allaaserisaq naggaserneqarpoq pilluarneq inuunerup ingerlarngani sivikitsunnguamik misigineqartarsinnaasoq.
Tamannalu ilisarnarpoq.