Naartuersittarneq pillugu siunnersuisarnissamut aningaasat
Taamaaliussaanga - taamaaliussanngilanga. Arnat nalornilersoortorujussuusarput naatsorsuutiginngisaminnik kissaatiginngisaminnillu naartuleraangamik
Danmarkimi naartuersinnissamut ikorfartortitut nakorsamik imaluunniit isumaginninnermi siunnersortimik oqaloqatiginnittarnerit qulakkiissavaat qitornartaarnissaq imaluunniit naartuersinnissamik aalajangiineq eqqarsaatigilluagaanersoq. Taamaattumik Folketingip peqqinnissamut ataatsimiititaliaata akuersissutigaa ikiuiniaqatigiit Mødrehjælpen 1,5 millionit koruuninik ukiuni tulliuttuni pingasuni tapiissuteqarfigisarniarlugu tarnikkut aamma isumaginninnikkut arnanik aappariinnillu nalornisunik siunnersuisarnissamut.
Taamatut allaaserisaqarpoq Kristeligt Dagblad.
- Ajornartorsiutaalluinnarpoq arnat 24-t ataallugit ukiullit naartuersinnerup kinguneri aamma taamatut periarfissaqarneq pillugu siunnersorneqartartut taamaallaat 8 procentiummata. Naartuersinnissamik aalajangerneq sakkortoorujussuuvoq, tamannalu tarnikkut annertuumik ajornartorsiornermik kinguneqarsinnaalluni. Taamaattumik siunnersorneqarnissaq pisariaqarpoq, Per Ørum Jørgensen (KD) aallarniisuuvoq tapiissuteqartitsisalernissamut.
Kristendemokratit 2000-imi atuutilersippaat arnat naartuersinnissamut qinnuteqartut naartuersinnginnginnermi imaluunniit naartuersereernermi ikorfartorneqarnissamut oqaloqatigineqartarnissaannik neqeroorfigineqartarnissaat tamanna pisariaqartikkunikku. Ataatsimiititaliallu aalajangiussaqarneratigut inuttut namminneq isumaginninnermi siunnersortimik oqaloqatiginninnissamut aamma periarfissaqalerput. Neriunarporlu tamanna naartuersittarnernik ikilisaataajumaartoq, Per Ørum Jørgensen oqarpoq.
- Tunngaviatigut naartuersinneq akerleraarput, kisiartaagattali taamatut isumaqartut, taava naartuersittarnerit ikilisarneqarnissaannut sulissuteqarniarpugut. Siunnersorneqarnissaq pissusissamisuuginnarpoq aallartiffigissallugu, oqarpoq.