Odensemut ornigulluarput
Juliane Henningsenip ornigulluartoqarnera nuannaarutigaa tusarnaartuninngaannillu sulinerminut isumassarsilluarnerarpoq.
Kalaallit savalimmiormiullu 70-it tungaannut amerlassuseqartut sisamanngormat Odensemi Kalaallit Illuanni, Nunat Avannarliit Suleqatigiiffiata ukiut qulinngortorsiornerani katersuupput. Folketingimi ilaasortat Juliane Henningsen aamma Høgni Hoydal oqallissaarumik saqqummiipput ukiut qulini Christiansborgimiissimanertik pillugu. Tamatuma nalaani tusarnaartut periarfissinneqarput isummaminnik saqqummiussinissaminnut.
Juliane Henningsenip ornigulluartoqarnera nuannaarutigaa tusarnaarianillu arlalinnik isumassarsinerarpoq sulinerminut atatillugu.
- Nangeqqitassatsinnik arlalinnik allattuivugut. Soorlu assersuutigalugu Danmarkimi kalaallit palasiannut tunngasumik suliaqarnerup ingerlatiinnarnissaa. Kalaallit Danmarkimi najugaqartut oqaatsitigut pisinnaatitaanerat malinnaaffigineqarluassasoq, aammattaaq kalaallit savalimmiormiullu utoqqaanerusunut atugarisaat misissuiffigineqarluassallutik, Juliane Henningsen oqarpoq.
Ilanngullugu Inatsisartuni ilaasortat peqatigalugit oqallinnerit amerlanerusut ujartorneqarput.