Siumup Alcoa nunami allamiunik sulisoqarnissaa ammaapaa
- Saneqqunneqarsinnaanngitsutut piumasarissavarput sulisartut allamiut akikitsut atorsinnaanerinut akuersisoqassappat taamaallaat aatsiterivimmik erngullu nukii atorlugit nukissiorfinnik sanaartornerni atorneqassammata, allanut naamik, Karl Lyberth Siumut oqarpoq
- Aluminiumik aatsiterivik nunatsinnut tamarmut ukiorpassuarni annertuumik iluaqutaasussaammat piviusunngortinnissaanut Siumut suleqataajuassaaq. Siumup politikkikkut Inatsisartuni oqaaseqartarsua Karl Lyberth tusagassiuutitigut nalunaaruteqarluni naqissusiivoq.
- Pilersaarutillu piviusunngortinnissaanut aporfiusinnaasunik tamanik qaangiiniarnermi, sulisartoqarnermut apeqqutit ilanngullugit, oqaloqataassalluta, Karl Lyberth oqarpoq erseqqissaallunilu:
- Aammami Siumumi siuttuulluta suliaq aallartinnikuugatsigu pingaartipparput pilersaarutip sapanginneqannginnissaa.
Taammattumik sulisartut nunanit allamiut atorneqarnissaat ammaassigigaa oqaramimi, sulisartut allamiut akikitsut atorsinnaanerinut akuersisoqassappat taamaallaat aatsiterivimmik erngullu nukii atorlugit nukissiorfinnik sanaartornerni atorneqassammata, allanut naamik.
- Pilersaarummut tunngatillugu suliassanut allanut, soorlu aqqusinniornernut talittarfiliornernullu, nunatsinni pissutsit nalinginnaasut soorunami atorneqassapput, aluminiumillu aatsiterivik aallartippat akissaatit nunatsinni atuuttut pinngitsoornatik atorneqassallutik, Karl Lyberth erseqqissaavoq.
Ilanngullugu oqaatigaa, suliffeqarfissuit nunatsinni suugaluartunilluunniit aallartitsiniarlutik nunatsinnut isertut nunatsinni pissutsinut sutigut tamatigut naleqqussartarnissaannik, aamma akissaatit eqqarsaatigalugit, Siumumit tunngaviusumik isumartik allanngortissimanagu attattuassallugulu.
- Erseqqissaatigissavarput sulisartut nunatsinni najugaqartut sutigut tamatigut illersorneqarlutik salliutinneqartuaannarnissaannik Siumumiit isumarput attattuaratsigu, aamma uunga suliamut aluminiumik aatsiterivissamut tunngatillugu!
- Aluminiumik aatsiteriviup piviusunngortinniarnerani sulisartut nunatsinneersut sallerpaatinneqarlutik sulisorineqassapput, sulisartullu allamiut international-i atorlugu akissarsiallit aatsaat atorneqassallutik sulisartunik nunatsinneersunit pissaqanngivinnermi, Karl Lyberth oqarpoq.
- Taamaakkaluartoq isiginngitsuusaarsinnaanngilarput nunatsinni suliffissaaleqisut sukkasuumik qaffakkiartornerat, akuerineqarsinnaanngitsumik innuttaasut ajornerusumik atugaqalerneranik kinguneqartumik. Tamanna pissutigerpiarlugu aluminiumik aatsiterivissap piviusunngornissaanut aporfiusinnaasunut aaqqiiniarnernut Siumut suleqataanissaminut piareersimavoq, Karl Lyberth oqarpoq.