Ajuunnerpaajoqqippoq
Nunanut allanut unammisarroq Aqqaluk Sørensenip piffissaq eqqorluarlugu assammik arsarluaqqilerpoq
Pingasunngormat pokalinnanniunnermi Otterup HK-mut unamminermi Aqqaluk Sørensen klbbimini Faaborg HK-mi ajuunnerpaajoqqipppoq. Faaborgip qularnaateqanngitsumik 29 - 24-mik ajugaanerani arfilinilinnik isertitsivoq.
Unamminerup inernissaata qanoq innissaa pisanganarsinngitsoorpoq 1. divisionimi normu 10-usup Faaborg HK-p aamma 2. divisionimi normu 2-usup unammineranni. Unamminerup ingerlanerata ilaani Faaborg HK ajuunnernik qulinik siulliuvoq.
- Pisarnermit ullumi ajornanngineruvoq unammisartakkanut 1. divisionimeersunut sanilliussissagaanni. Iluatsitsineq annertunerulaartoq aamma unamminermi tamaviaarneq annertunerummat, taava isertitavut 4-nik - 5-nik amerlanerusinnaagaluarput, Aqqaluk Sørensen iluarusulluni unamminerup kingorna oqarpoq.
Unamminerit aappassaanni tulleriiginnarni Faaborgip sungiusaasua Jakob Larsen unammeqataavoq.
Faaborg HK ukioq manna pokalinnanniuunnermi kvartfinalimut annguppoq.