Nanuaraq kalaallisut atserneqassaaq
Aalborgip uumasuuteqarfiani uumasunik paarsisut nanuaraq sisamanik qaammatilik angutiviaasoq paasivaat. Kalaallisut atserneqassaaq.
Nanuaraq arnaalu Aalborg Zoo-mi 'ernisarfimmiittut' uumasunik paarsisut sivikitsumik avissaartippaat. Marluullutik naammagittaaqaat, piaraq qataatsumik nillialluni arnaatalu Malik-up matu sakkortuumik kasuttorlugu.
Minutsilli pingasut ingerlanerinnaani piaraq oqimaalutarneqarpoq, maanna 15 kg missaaniilersimasoq. Meqquinillu dna-kut misiligutissanik tigusineqarpoq, uumasunilli paarsisut piaraq misissoqqissaarsinnaavaat, maannalu qularutigiunnaarpaat nanuaraq angutiviaasoq.
Aalborg Zoo-mi uumasulerisut pisortaat Per Christiansen Nordjyske-mut oqarpoq, nanuaraq atserneqassasoq.
- Kalaallisut ateqassaaq - nunat avannarliit oqaasitoqai malinnagit, soorlu Bjørn (Nanoq). Kalaallit atii arlallit toqqassavagut, kikkulluunniit taasissutigisinnaasaat, oqarpoq.