Akileraarutit apparlugit - suliumatussuseq qaffallugu

Akilaartarnermut Atugarissaarnermullu Ataatsimiititaliap inassutigisaasa atuarnissaat Demokraatit qulanaarisimavaat. Oqaatigereerlaralu; utaqqineq pakatsinanngilaq

Jens B. Frederiksen: - Inuiaqatigiinni nutarterinissarput pisariaqartipparput, taamaalilluni atugarissaarneq minnerpaamik ullumikkutut inissisimaannarniassammat. Foto Leiff Josefsen

Aallaqqaasiullugu Akileraartarnermut Atugarissaarnermullu ilaasortat qutsavigerusuppagut. Inuiaqatigiit siunissami qanoq aaqqissuunnissaat pillugu oqallinnissamut tunngavilersorluagaq nalunaarut atuarlugu iluarinarpoq, Demokraatinut siulittaasoq Jens B. Frederiksen tusagassiuutitigut nalunaarummi allappoq.

Tunngaviusumik Demokraatinut erseqqissaatigissallugu pingaaruteqarpoq, inassutigisat amerlanersaat tapersersoratsigit, politikkikkullu oqallinnissat qilanaaraagut, neriuutigalugu isumaqatigiissutinik tamatigoortunik kinguneqarumaartut.

Inassutigisalli marlussuit Jens B. Frederiksenip erseqqissaatigerusuppai, Demokraatit 2002-mili partiitut pilersinneqarmatali politikkianni ilungersuutigisimasaminnut tulluuttuummata, oqarneratut.

Sulinermi akileraarutit annertuumik appartinneqarnissaat inassutigineqarmat iluarisimaarparput. Taama inassuteqarnerup kingunerissavaa inuussutissarsiornermi sulinerulernissamut kaammattuutaanerussammata, tamannalu pitsaalluinnarpoq, ajoraluartumimmi ullumikkut imaakkami, sulineq inuit ilaannut imminut akilersinnaanngilaq. Akileraarutillu appasinnerusut suliumatussuseqarnerunermik sunniuteqassapput. Inuit suliartornissartik qilanaarinerulissavaat, akissarsiammi allagartaasigut takunneqarsinnaassammat qaammatit tamaasa aningaasat amerlanerusut kontomut ikineqartassammata.

Demokraatinullu erseqqissaatigissallugu pingaaruteqarpoq, isumalioqatigiit isumaqatigilluinnaratsigit maanna killiffik periarfissaanngimmat. Inuiaqatigiit nutarteriffigineqarnissaminnik pisariaqartitsipput, taamaalilluni atugarissaarneq minnerpaamik ullumikkutut inissisimasinnaaniassammat. Ilatsiinnarluta isiginnaartuuinnarnissarput iluaqutaanngilaq, aaqqiissutissallu takkunnissaat neriuutigiinnarlugit. Ilatsiinnarneq taamaatittariaqarparput, akerlianilli inuiaqatigiit sumut ingerlanissaat eqeersimaarluta sunnerniartariaqarlutigu. Isertuussassaanngilaq inassutigisat ilaat iluarineqarnatillu nuanniigineqassammata, uagulli politikeritut aalajangiinissat pisariaqartut aalajangiiffigissallugit suliassarigatsigu, siunissaq ungasinnerusoq eqqarsaatigalugu nunatsinnut iluaqutaanerulersissallutigik, Jens B. Frederiksen allappoq.

Powered by Labrador CMS