Qaanaami pitsaaliuinermik sammisaqarneq
Qaasuitsup Kommuniani pitsaaliuinermut pisortaq Helga Nielsen sapaatit akunnerini marlunni Qaanaamiissaaq nunaqarfiinilu Qeqertani aamma Siorapalummi.
Sapaatit akunnerini tulliuttuni marlunni Qaanaami nunaqarfiinilu Siorapalummi Qeqertanilu innuttaasut ilinniarneq pitsaaliuinerlu sammissavaat. Qaasuitsup Kommunianit tusagassiuutitigut nalunaarummi taama allassimavoq.
Tukummeq Henson qanittukkut pitsaaliuinermik siunnersortitut Qaanaami atorfinitsinneqartoq, sapaatillu akunnerini tulluittuni Helga Nielsen peqatigalugu Qaasuitsup Kommuniata avannarpasinnersaani pitsaaliuinermik suliaqarneq immikkut aallartissallugu.
Helga Nielsen ilisimatitsivoq ilaatigut Qaanaami ilaqutariinnut sulliviliortoqarnissaanik periarfissat, suliniut "Qinngasaarisoqassanngilaq", nerisaqarneq kiisalu kinguaassiuutitigut tunngasunik ilinniartitsineq Qaanaamiinnermini eqqartussallugit.
Ilaatigut Qaanaami innuttaasut ataatsimiisinneqassapput oqallisigineqassalluni "Inuuneritta". Atuarfiup katerisimaartarfiani ilaqutariinnut sammisassaqartitsissaaq ilaqutariinnilu nerisaqarneq pillugu. Taamattaaq qinngasaarisoqannginnissaa pillugu saqqummiussisoqassaaq, kiisalu nakkaannartarneq qinngasaarisarnerlu pillugit angajoqqaanik ataatsimiisitsineqassalluni. Taamattaaq kinguaassiornermut tunngasunik atuarfimmi ilinniartitsineqassaaq. Ungdomsklubbimi pitsaaliuineq atoqatigiittarnerlu pillugit ataatsimiinneqassaaq. Unnuaanerani angalaartartunik "Natteravn"-inik pilersitsinissaq pillugu ataatsimiisitsineqassaaq kiisalu pitsaaliuineq attaveqarfissanillu pilersitsinissaq pillugit suliffeqarfinnik ataatsimiisitsineqassalluni.
Sammisat tamakku assinginik Siorapalummi aamma Qeqertani ataatsimiisitsisoqartussaavoq.