Borgmester Jess Svane Qaanaamut tikeraassaaq
Utimut ingerlanermini Upernavimmi innuttaasunik ataatsimiititsinissaq pilersaarutigaa
Sapaatit akunnerat tulliani borgmester Jess Svane (S) Qaanaaq kommunimilu nunaqarfiit avannarlersaat tikeraassavai. Borgmesterip innuttaasut ataatsimeeqatigissavai sumiiffimmilu pissutsit pillugit eqqartueqatigissallugit.
Pingasunngorpamiit sapaatit akunnerat ataaseq Qaasuitsup Kommuniata borgmesteria, Jess Svane (S), Qaanaaq nunaqarfiillu marluk, Siorapaluk aamma Qeqertat angalanissamini tikissavai. Jess Svanep ikaarsaariarnermut ataatsimiititaliami siulittaasuutilluni kommunip inoqarfia avannarlerpaaq tikeraaramiulli, aatsaat maanna Qaanaaq tikeqqilerpaa.
Jess Svanep Qaanaami qinersivimmit ilaasortaq Jens Danielsen (S) peqatigalugu innuttaasunik ataatsimeeqateqarnissani inoqarfimmilu pissutsit pillugit tusarfiginissai qilanaarivaa.
- Arlaleriarlunga Qaanaaliarnissannut kaammattorneqartarsimavunga, maannakkulli kiisami periarfissaalerpoq, Jess Svane taama oqarpoq.
Borgmesterip Qaanaaliarnerani Piniarnermut Aalisarnermullu Ataatsimiititaliami siulittaasup tullia Abel Karlsen (KP), angalaqataassaaq, tamatumalu saniatigut Qaasuitsup Kommuniani pinaveersaartitsinermi fagchefi Helga Nielsen angalaqataassalluni.
Pinaveersaartitsinermut suliat taavalu ”Inuuneritta” pillugit Qaanaap timersortarfiani innuttaasut ataatsimiisinneqassapput, ulloq 17. marts, tamatumanilu borgmesteri peqataassaaq.
Qaanaamiit utimut angalanermi Jess Svane Upernavimmiinnissani ulloq 23. marts periarfissaraa, illoqarfiummilu innuttaasunik ataatsimiititsinissaq naatsorsuutigineqarpoq.