Maniitsoq Efterskolemi ilinniarusuttut amerlapput
Maniitsumi efterskolemi atuaqatigiinni siullerni septembarimi aallartittussani atualerusullutik amerlasuut soqutiginnissimapput
Inuusuttut 160-it sineriammi tamaneersut qinnuteqarsimapput, atuaqatigiikkaallu 60-inik ilinniartullit, atuarfiup illutigut periarfissiineri malillugit, katiternissaat pillugu annertuumik suliassaqartoqalerpoq, Ilinniartitaanermut Ilisimatusarnermullu Naalakkersuisoqarfik tusagassiuutitigut nalunaarummi allappoq.
- Maniitsoq Efterskole-mi atualerusullutik soqutiginnittut taama amerlatigineri soorunami nuannaajallannarpoq, taamaattorli Maniitsumi ukioq ataaseq efterskolernissaminni qilanaarsimasut taama amerlatigisut pakatsisissallugit nuanninngilaq, efterskolemi forstander Flemming Cederholm oqarpoq nangillunilu:
- Maanna qinnuteqaatit tamaasa misissuleruttorpavut, taamaalereerpallu qinnuteqartut kingusinnerpaamik apriilip aallaqqaataani allagarsissapput, iluatsitsisut akornaniinnerlutik paasitinneqassallutik. Qinnuteqartut pakatsisinneqartut eqqarsaatigalugit utaqqisunut allattuiffimmut ilanngunneqassapput, ilinniartunngortussatut tigutissimasut ilaat taamaatiinnassagaluarpata atorneqartussaq, tusagassiuutitigut nalunaarut malillugu oqarpoq.
Efterskolemi pinngitsoorani ilinniagassat sisamat atuartitsissutigineqassapput; Kalaallisut, Danskisut, Tuluttut aamma Matematik. Fagit taakku meeqqat atuarfianni soraarummeernertut misilitsiffigineqassapput. Taakku saniatigut atuarfiup saniatigut fagiutaasa pingasut arlaat toqqarsinnaavaat, tassaasut Timersorneq, Nipilersorneq sammisarlu ataaseq qulequtserneqartoq "nuna, imaq aamma nerisassat".
- Efterskolemi suliaqarfitsigut inuttullu annertuumik siunniussaqarpugut, atuartullu efterskolemeereerunik inuusuttut ilinniarfiinut ingerlaqqinnissaannut sutigut tamatigut ukiup atuarfiusup ingerlanerani atuartut piukkunnarsarluarnissaat annertuumik qitiutipparput, tusagassiuutitigut nalunaarut malillugu forstander Flemming Cederholm oqarpoq.