Aima Paris-imi peqataassaaq
Paris-imi atuakkanik nuisitsisarfik Salon du livre Bolatta Silis.Høegh-mit peqataaffigineqassaaq, atuakkiani Aima ilisaritittussaallugu.
Atuakkanik nuisitsisarfiup Salon du livre-p Nunat Avannarliit sammissavai, peqataasunut akuussalluni Bolatta Silis-Høegh, meeqqanut atuakkiamik Aima-mik atuakkiorlunilu assiliartalersuisimasoq.
Aima arfinillik ukioqarpoq eqqarsaatersorluartartoq suullu tamaasa nammineq isumaqarfigalugit. Aatami aalisaqatigisarnera ajamilu nuniagaqatigisarnera nuannarilluinnarpaa. Maanna franskit sunnerniartussanngorpai, tamannalu iluatsillugu saqqummersitsisarfiup Malik-up Aima pillugu atuakkiaq franskisuunngortissimavaa.
Bolatta Silis-Høegh Danmarkimi Kunststyrelsens Litteraturcenterimit Parisimut qaaqquneqarpoq, ullunilu sisamani nuisitsinermi pisunut marlunnut peqataassalluni. Arfininngornermi 19. marts atuakkiortoq finlandimiu aamma samet nunaanneersoq peqatigalugit pinngortitap isumassarsiorfigisarnera pillugu oqaluttuassaaq, ataasinngornermilu marsip 21-ani assiliartalersukkani saqqummiutissavai, nunani avannarlerni eqqumiitsuliortut tusaamasat sisamat peqatigalugit, ilaatigut qallunaaq Jakob Martin Strid aamma norskeq Stian Hole.