Innarluutillit pitsaanerusumik ilinniartitaanissaat
Innarluutillit ukiut pingasut angullugit efterskolersinnaanissaat Juliane Henningsenip siunnersuutigaa.
Inuusuttut innarluutillit ukiut pingasut angullugit efterskolersinnaanissaat Inuit Ataqatigiit sinnerlugit Inatsisartunut ilaasortap Juliane Henningsenip siunnersuutigaa: - Inuusuttut innarluutillit inuunermi pitsaassusiat pitsanngorsarnissaat ineriartornissaannullu periarfissinnissat siunnersuutima siunertaraa.
Ilaatigut Stubbekøbing Efterskole isumassarsiorfigisimavaa, ilinniartunut immikkut pisariaqartitsisunut atuarfiusoq. Stubbekøbing Efterskole efterskole-uvoq mikisoq atuartunut 8. klasse-mit qummullu atuartunut 50-inut inissaqartitsisoq. Atuartut immikkut pisariaqartitsisut, ilikkarnissaminnik ajornartorsiuteqartut kingusissumilluunniit perorsimasut sullinneqarput. Atuartut ukiut arlallit atuarfimmiikkajuttarput, nalinginnaasuunngilarli atuartut kingusissumik perorsimaneri peqqutigalugit 11. aamma 12. klasse angullugit atuartarnerat.
- Ukiut pingasut angullugit sivisussusilimmi efterskolersinnaaneq Danmarkimi periarfissaavoq, taamaammallu innarluutillit tapiiffigineqarnissaminnik qulakkeerinnillutik atuarsinnaapput, soorlu atuarnerat tamaat ilinniarnersiuteqartillugit, Juliane Henningsen oqarpoq, isertuutinngilaalu Nunatsinni innarluutilinnut atuarfiliortoqarsinnaanera takorloorini.
Ajorsinneqarneq
Innarluutillit innuttasutut allatut atuarnissaminnut ilinniarnissaminnullu tunngaviusumik assigiimmik pisinnaatitaaffeqaraluartut, meeqqat inuusuttullu tamakku ilaat ilinniarnermi ajorsinneqartarput, najukkami eqqaani imaluunniit Kalaallit Nunaanni neqeroorfigineqarsinnaannginnamik.
Innarluutilinnut amerlasuunut efterskolerneq ilinniaqqinnissamut periarfissatuaavoq, taamaammallu Juliane Henningsen malillugu efterskolet ilinniarnivittut isigineqartariaqarput. Taamaammat inuusuttut innarluutillit efterskolertut ilinniartutut allatulli assinginik pisinnaatitaaffeqartariaqaprut, soorlu ilinniarnersiuteqartillugit. Juliane Henningsenip siunnersuutigaa innarluutillit ukiut pingasut angullugit efterskolersinnaasut, taamaalilluni aningaasatigut tapiiffigineqarnissaq ukiut tamaasa qinnutigisariaqarnagu.
Innarluutillit efterskoleriartut kingornalu ilinniaqqittut inuiaqatigiinnut kalaallinut attaveqartuarnissaat pingaaruteqartutut isumaqarfigaa, taamaalilluni Nunatsinni ilinniarnissamut neqerooruteqannginneq innarluutillit nunaminnit aallartinneqartutut misigissanngimmassuk.
- Innarluutillit kalaallisut innuttaapput inuiaqatigiinnut kalaallinut attaveqartuarnissaminnik periarfissinneqatussat, siunnersuumminut marlunngornermi Inatsisartuni oqallisigineqartussamut tunngavilersuutitut oqaatigaa.