Ane Hansen sallunerluni
Hans Enoksenip paaserusuppaa Ane Hansen eqqortumik oqalunnersoq oqarami, naalakkersuisuusimasut Henrik Lethip aamma Keld Askærip tunuarnersiutaat akuersaarsimagaat
Naalakkersuisut siulittaasorisimasaata maannakkullu Inatsisartuni Siumut sinnerlugu ilaasortaasup Hans Enoksenip paaserusuppaa, Royal Greenlandimi pisortaasimasut marluk Keld Askærip aamma Henrik Lethip tunuarnersiutaasa annertussusiat kikkut akuersissutigisimaneraat.
Royal Greenlandimi pisortatut atorfimminnit tunuarput 2006-imi novembarimi tamarmik katillugit millioninik marlunnik kisitsisitalinnik tunuarnersiuteqarlutik. Askær Royal Greenlandimi pisortaaninngorpoa 2001 kiisalu Henrik Leth suleqatigalugu ingerlatsiviup ingerlanera ilorraap tungaanut saatillugu.
Hans Enoksenip apeqquteqaatimini tikuarpaa Inatsisartuni 15.marts 2011 Aalisarnermut piniarnermut nunalerinermullu Naalakkersuisup Inatsisartuni oqallinnermi oqaatigaa Royal Greenland-imi pisortat tunuartut Keld Askær aamma Henrik Leth pisortatut tunuarnersiutaat Naalakkersuisuusimasut kingulliit akuerisaannik angissusilerlugit tunineqarsimasut tamanna ilumoornersoq paaserusuppara.
- Tamannalu ersarissumik uppernarsarneqartariaqarpoq, Hans Enoksen oqarpoq nangillunilu:
- Naalakkersuisuusimasut aalajangiinerminni tunngaviit, aammalu ataatsimiinnermi ullormi sumi aalajangerneqarsimanersut, kiisalu aalajangiinermi imaqarniliat ilanngullugit nassuiarneqassasut kissaatigaara, Hans Enoksen oqarpoq, tunngavilersuutiminilu naalakkersuisuni ilaasortaq Ane Hansen siusinnerusukkut eqqunngitsumik oqalussimanerarlugu.
- Apeqqutima ersarissumik akineqarnissaat kissaatigaara, tassami Aalisarnermut piniarnermut nunalerinermullu Naalakkersuisup ataasiarani eqqunngitsumik inuiannut saqqummiussisarnera ilumoornersoq uppernarsarneqartariaqarpoq. Tassalu tunuarnersiutit kiap akuerisimanerai ersarissumik Naalakkersuisut siulittaasuata uppernarsaassagaa kissaatigaara, Hans Enoksen oqarpoq.