Ilisimatusarnerup siuarsarneqarneranut tapiissutinik agguaaneq

Ilinniartitaanermut Ilisimatusarnermullu Naalakkersuisoq, Palle Christiansen, Namminersorlutik Oqartussat ilisimatusarnerup siuarsarneqarneranut immikkoortitat aqqutigalugit nunatsinni ilisimatusarnerup siuarsarneqarnissaanut suliniutinut suliassanullu aningaasaliissuteqarpoq. Suliassanut katillugit 17-iusunut 450.000 kr.-ingajannik tapiissuteqarfiusunut tapiissuteqartoqarpoq.

Ilaatigut nunatsinni ilisimasanik paarlaasseqatigiittarneq ilisimasaqaleriartornissarlu taperserniarlugu ataatsimeersuarnernut qulingiluanut ataatsimeeqataanernullu tapiissuteqartoqarpoq. Ilisimasanik paarlaasseqatigiinneq ilisimatusarnermi pingaaruteqarpoq, tamatumani ilisimatusartut ilisimatusartunik nunanit allaneersunik naapeqateqartarlutik tassanilu ilisimatusarnerminnit angusaminnik paarlaasseqatigiittarlutik siunissamilu misissuinermi atugassanik nutaanik ilisimasaqalertarlutik.

Naalakkersuisup Palle Christiansenip ilisimatusarnerup siuarsarneqarnissaanut immikkoortitatigut kissaatigaa nunatsinni ilisimatusarnerup nukittorsarneqarnissaa ilisimatusartalerumaartussallu inuusuttut taperserniarlugit immikkut suliniartoqarnissaa taamaalillunilu nunatsinni ilisimatusarnikkut avatangiisit nukittorsarneqarnerannut pilersikkiartorneqarnerannullu tapersiinissaq. Taamaattumik taamatut tapiissuteqarnikkut nunatsinni ilisimasaqaleriartornermut inuiaqatigiillu ineriartornerannut iluaqutaasumik ilisimatusarnerit pitsaasut taperserneqarnissaat neriuutigaa.

Suliassanik makkuninnga aallartitsinissamut aningaasaliisoqarpoq:

Climate Change and Seawater Acidification. Suliassami siunertaavoq CO2-p qaffasissusiata pH-llu allannguuteqarnerita qanoq issittumi uumasoqarnermi uumasoqatigiit katitigaanerannut piaqqiortoqarneranullu sunniuteqartarnerata misissorneqarnissaa - Ilisimatusartoq Kristine Engel Arendt.

Kujataani savat ivigartortarnerisa silaannaallu allanngoriartornerata naasunut takinerusunut kinguneri (Betydning af fåregræsning og klimaændringer for biodiversiteten blandt højere planter i Sydgrønland). Suliassaq Kujataani pissaaq (Narsarsuaq, Upernaviarsuk aamma Qassiarsuk) kiisalu Pinngortitaleriffimmi – Ilisimatusartoq Josephine Nymand.

Sedimentation og stofomsætning i havbunden i Young Sound, NØ Grønland. Suliassaq Young Soundimi, Avannaani pissaaq Pinngortitaleriffiup, Danmarks Miljøundersøgelser-ip aamma Syddansk Universitetip suleqatigiinnerisigut – Ilisimatusartoq Martin Emil Blicher.

Kalaallit Nunaanni nimeriaqassutsimik misissuineq (Undersøgelse af åleforekomsten i Grønland). Nuummi kangerloqarfinni misissuisoqassaaq – ilisimatusartoq Kaj Sünksen.

(Tunumi suluppaakkat itisoormiut (Dybhavsrødfisk ved Østgrønland). Suliassaq nunani avannarlerni ataatsimut misissuinertut pissaaq Tunumilu pissalluni – Ilisimatusartoq Jesper Bøje.

Kalaallit Nunaanni ileqqut pillugit Upernaviup eqqaani suliaqarneq (Feltarbejde i Upernavik området om grønlandske skikke). Suliaq Upernavimmi Kullorsuarmilu pissaaq ileqqunullu pingasunut tunngassalluni: Seqqorneq, Paggatitsineq aamma Qutsaderneq – Ilinniartoq Magdalene Karen Møller.

Air Greenlandimi, Kommuneqarfik Sermersuumi, Royal Greenlandimi Mittarfeqarfinnilu kalaallit sulisuusut 35-50-inik ukiullit parodontitiseqarnerannik nammineq nalunaarsuineq (Selvrapporteret tandhelse of forekomst af tegn på parodontitis hos 35-50 årige grønlandske ansatte hos Air Greenland, Kommuneqarfik Sermersooq, Royal Greenland og Mittarfeqarfiit). Kalaallit sulisuusut 35-50-inik ukiullit parodontoseqarnerannik erseqqissaanissaq siunertaavoq – Ilinniartoq Aviaja Fleischer.

iFacilitator Greenland. Ilisimatusarnikkut suliat inuiaqatigiinnik ineriartortitsinermut atorneqarsinnaasut suussusersineqarnissaat nukittorsarneqarnissaallu suliassami siunertaavoq – Special advisor Jan Mørch Pedersen.