Allornerit siulliit - atuakkap aappaa
Nuka Godtfredsenip nunatta oqaluttuarisaaneranut tunngatillugu titartagai Sermitsiami nangipput
Sermitsiami ullumi saqqummersumi nunatta oqaluttuarisaanera pillugu Nuka Godtfredsenip titartagai saqqummersinneqarput.
Sapaatip akunnerini arlalissuarni tulliuttuni sapaatip akunneri tamaasa oqaluttuarisaanermiit immikkoortumik ataatsimik saqqummertoqartassaaq.
Uani sapaatip akunnerani oqaluttuarisaaneq pingaarnertullu inuttaasut ilisaritissavagut, sapaatip akunnerinilu tulliuttuni, Danmarkimi katersugaasivissuarmiit Martin Appelt aamma nunatta katersugaasivianit toqqorsivianiillu Paulini K. Knudsen titartakkat oqaluttuassartaat pillugit allapput. Oqaatsit paasiuminartut atorlugit tunersuit silarsuaanit oqaluttuaavoq, kiisalu qallunaatsiaat inuillu naapinnerat pillugu.
Atuakkami siullermi Nuka Godtfredsenip Kristusip inunngornera sioqqullugu ukiup 2.500 missaani Saqqarmiut oqaluttuarai, atuakkallu aappaani 1100-kunni nunatta avannaa kitaani kulturit pingasut aporaannerat oqaluttuaralugu.
Oqaluttuaq pissanganartoq malinnaavigerukkukku, nunatta oqaluttuassartaa paasisaqarfigerusullugu kiisalu titartakkat katersorusukkukkit, taava ullumimiit aviisi pisiarisaleruk.