Kusanaalluinnarpoq

Sivso Dorphip taama oqarnermini pivai naalakkersuisunut ilaasortat marluk tusagassiuutit aqqutigalugit isumaqatigiinniarlutik aallartissimasut.

- Kusanaalluinnarpoq naalakkersuisunut ilaasortat marluk tusagassiuutit aqqutigalugit isumaqatigiinnialersimammata, Imakimi siulittaasoq Sivso Dorph tusagassiuutitigut nalunaarummi allappoq, innersuussutigalugulu namminersorlutik oqartussat Imakillu akornanni isumaqatigiinniarnerit ukiumik ataatsimik kinguaattoorlutik aallartinniarneqalersimasut.

- Ilinniartitaanermut naalakkersuisoq nutaaq Palle Christiansen aallartippoq, taava aningaasaqarnermut naalakkersuisoq nutaaq Maliina Abelsen isumaqatigiinniarnerit ingerlanneqartut pillugit oqaaseqarluni.

- Allassimasunik allassimanngitsunillu maleruagassaqarpoq, ataqqeqatigiinnerup aqqani isumaqatigiinniarnerit ingerlanneqartut pillugit tusagassiuutitigut oqaaseqartannginnissaq pillugit, Sivso Dorph oqarpoq.

- Naalakkersuisut ilinniartitsisut kattuffiannik isumaqatigiinniarnissamik kinguartitseqattaarput, maannakkullu ukiumik ataatsimik kinguaattoorluni isumaqatigiinniarnerit aallartipput. Tamanna namminermi mamianartupilussuuvoq. Maannakkut naalakkersuisut tusagassiuutit aqqutigalugit isumaqatigiinniarlerput. Nunatsinni kisermaassilluni naalakkersuineq eqqunniarneqalernerluni, naalakkiinerillu aqqutigalugit naalakkersuisoqalerluni, Sivso Dorph aperaaq.

Taama ilaatigut oqarnermini allanngikkaluarpaa uani pivaa sapaatip akunnerani uani Sermitsiami Maliina Abelsen akileraartarnermut atugarissaarnermullu ataatsimiititaliap innersuussutaanut atatillugu isumaqatigiinniarnerit pillugit oqaaseqarmat, isumaqatigiinniarnermut ilanngukkusutaminik. Ilaatigut oqarpoq siunissami akissarsiat qaffanngaarnissaannut akissaqartoqanngitsoq.

- Imakiop kissaatiginngilaa tusagassiuutit aqqutigalugit isumaqatigiinniarnissaq sakkortuumillu kajumissaarutigalugu isumaqatigiinniarnerit illuatungisaqq peqatigalugu ingerlanneqassasut piviusullu tunngavigalugit, Sivso Dorph oqarpoq.