Kiffaq-konto pilersinniarneqalerpoq
Akiitsut nunatta aningaasaqarneranik artukkiipput
Akileraartarnermut atugarissaarnermullu ataatsimiititaliap kiffaq-kontoliortoqarnissaanik siunnersuutaa piviusunngortinneqarnissaminut qaninnerulissaaq marlunngorpat ualikkut Inatsisartuni pisortanut akiitsut isertinniarnissaannut pinaveersimatinnissaannullu inatsisip allanngortinneqarnissaanut siunnersuut aappassaaneerneqarpat.
Ataatsimiitialiap kiffaq-kontomik siunnersuuteqarnertik pisariinnerarpaat: Akissarsiatigut isertitat pisortaniillu isertitassat soorlu pisortat ikiorsiissutaat, utoqqalinersiutit ineqarnermullu tapeq aningaaserivimmi kiffaq-kontomut nakkartinneqartassapput. Taava akileraarutit, ineqarnermut akiliutissaq, eqqaaveqarnermut utoqqalinersiaqalernissamullu akiligassat ingerlaannertumik kiffaq-kontomut nakkartinneqartassapput. Taamaalilluni kiffaq-konto atorlugu takuneqarsinnaalissaaq siunertanut allanut suut atorneqartussaanersut, innuttaasup nammineq atorsinnaasai.
Aningaasaqarnermut naalakkersuisup Maliina Abelsenip, Inuit Ataqatigiit, pisortanut akiitsut ernumassutigai, taakkumi 2010-mi 1.245.000.000 koruuninut qaffariarsimapput, maannakkullu inatsit allanngortikkusuppaa, taamaalilluni akiitsut isertinniarnissaannut annertunerujussuarnik iliuuseqartoqarsinnaalissalluni.
Maliina Abelsenip akiitsut unitsikkusuppai ingerlaannartumik akiliisitseriaatsimik pilersitsinikkut. Ullumikkut nunatsinni inuppassuit aningaaseriviit akiliinissamut periusianik PBS-imik atuereerput, namminersorlutilli oqartussat suliffeqarfiit namminersortut pissarsiassaannik pinngitsaaliilluni akiliisitsinissamut inatsisiliorsinnaanani.
Piumassuseq aallaavigalugu
Atassut isumaqarpoq taamatut pinngitsaalisamik akiliisitsisarnissaq innuttaasunik kiffaanngissusiiaanerusoq.
- Soorunami Atassummi akiliiumanngittarneq akuersaarsinnaanngilarput, inuppassuilli akiliisinnaassuseqanngillat, Atassummiit Inatsisartunut ilaasortaq Knud Kristiansen Sermitsiaq.AG-mut oqarpoq.
Akilersueriaatsit soorlu Danmarkimi PBS ilaatigut sulisunut qaammammusialinnut tunngavoq, taannalu qaammatip aallartinnerani ineqarnermut, kattuffinnut ilaasortaanermullu akiliutinut akiliinissamut atuuppoq.
- Ullumikkut inuppassuit nunatsinni qaammammusineq ajorput, Knud Kristiansen oqarpoq, ilaatigullu tikkuarpaa SIK malillugu ullut 14-ikkaarlugit akissarsisartut aammalu aalisartut piniartullu qaammatip ingerlanerani isertitatik annikitsukkaarlugit pissarsiarisaraat.
Ernumassutigaa inuppassuit isertitakitsut kiffaq-kontoqalerpat isertitaat tamakkerlutik peerneqartarnissaat, inuillu aningaasaataarullutik. - Tamanna suliffeqarnissamut kajumissaataanngilaq.
Atassut isumaqarpoq nammineq piumassuseq aallaaviusariaqartoq.