Sermersooq: Meeqqeriviit pitsaanerusut atorfissaqartinneqarput
- Paaqqinniffeqarnermili soqutigisallit pingaarnerit qulaatiinnarlugit allanngortitsinissanut pilersaaruteqartoqanngilaq, kommuni erseqqissaavoq
- Kommuneqarfik Sermersooq isumaqarpoq kommunip ulluunerani paaqqinnittarfiini pitsanngorsaanissamut pisariaqartitsineqarlunilu periarfissaqartoq. Tamanna eqqarsaatigalugu aqutsisuni allanngortitsinissamut eqqarsaatit pilerput. Paaqqinniffeqarnermili soqutigisallit pingaarnerit qulaatiinnarlugit allanngortitsinissanut pilersaaruteqartoqanngilaq, William Kriegel oqarpoq, Kommuneqarfik Sermersooq-mi Ineriartortitsinermut Ingerlatsivimmi pisortaasoq.
Kommunip siunnersuutaanut sakkortuumik isorinnilluni oqaaseqaatit ilaatigut perorsaasut ilinniarsimasut peqatigiiffiannit P.I.P.-meersut Ineriartortitsinermut Ingerlatsivimmit ataasinngornermi nalunaarutaanut uiggiullugu Kommuneqarfik Sernersooq ima erseqqissaateqarpoq:
- Allannguutissatut taaneqartut pillugit aalajangiisoqarsimanngilaq. Taama aalajangiinissaq politikkikkut pissaaq. Soqutigisallilli pingaarnerit tusarniaaffigeqqaarnagit politikkikkut aalajangiinissat siunniunneqanngillat.
- Ingerlatsivimmi siunissamut suliassarput tassaassaaq, ulluunerani paaqqinniffeqarfimmi perorsaanikkut allaffissornikkullu aqutsinerup allangortinnissaa sammisami soqutigisallit susassaqartut oqallitsitsinissamut oqaloqatigiinnissamullu aallartitsinikkut. Ilaatigut eqqarsaatigineqarput perorsaasut, tamakku kattuffii angajoqqaallu, William Kriegel pingasunngornerup ualiani nassuiaavoq.