Immap naqqatigut kabelip ajutoorneranut iluliaq peqqutaagunartoq

Tele'p naatsorsuutigaa immap naqqatugut kabeli kingusinnerpaamik marsip qeqqqni attaveqaqqilissasoq - Nuummi aaqqiissut naammaginarsimanngilaq

Tele Alcatel Lucent Submarine Networks suleqatigalugu ajoqutip iluasinissaa pilersaarutigaa, suliffeqarfiullu naatsorsuutigaa immap naqqatigut kabeli kingusinnerpaamik marsip qeqqani attavilerneqassasoq. Foto: Leiff Josefsen

Aqqartartut Greenland Mining Service ikiorsiullugu Tele Greenlandip immap naqqatigut kabelimi ajoqutit misissoqqammerpai. Ajoqusiinerit sinerissamut qanittumi ikkattumi pisimapput, nalilerneqarporlu ajoqusiinermut iluliaq peqqutaasimasoq. Anori sakkortooq sumiiffimmilu angisuunik iluliaqarnera ataatsimoorlutik ajoqusiinermut nassuiaatissat ilagigaat.

Tele Alcatel Lucent Submarine Networks suleqatigalugu ajoqutip iluasinissaa pilersaarutigaa, suliffeqarfiullu naatsorsuutigaa immap naqqatigut kabeli kingusinnerpaamik marsip qeqqani attavilerneqassasoq. tamanna tikillugu kitaata nunarsuullu sinneranut nalunaarasuartaateqarneq radiokkut Qaqortumut aqqut atorlugu, tassanngaanniillu Islandimut Greenland Connet (immap naqqatigut kabeli) atorlugu attaveqassasoq.

- Tele sullitai nalunaarasuartaateqarnikkut ajortinneruneq malugissanngilaat, Tele tusagassiuutitigut nalunaarummi erseqqissaavoq.

Aaqqiineq naammanngilaq

Greenland Connectip piareersarnerani Tele'p nunarsuarmi immap naqqatigut attaviliinermi kiisalu sikut immallu naqqanik immikkut ilisimasallit suleqatigalugit illersuutissanik eqqortunik iluarsiinissaq nassaariniarsimavaat, taamaalilluni immap naqqatigut kabelip aqqutaa tamaat ilulissanit allatigulluunniit sunnerneqarnissaanut aarleqqutit annikillisinniarlugit, kiisalu Islandimi, Kalaallit Nunaanni aamma Canadami nunamut attaviini.

- Nuummi aaqqiissut toqqarneqartoq naammaginanngitsutut paasineqarpoq, immallu naqqatigut kabelip pitsaanerpaamik illersorniarlugu kabelit immap naqqanut matoorunneqartariaqartut. Taamaalilluni immap naqqatigut qaarsutigut sulluliorneqartariaqarpoq, taamaaliornikkut kabeli itissusilerneqassalluni ilulissat ikkarlinnerinit ajoquserneqarsinnaajunnaarlunin. Teknikkikkut allatigullu misissuinerit suli naammassinngilat, taamaammat iluarsiissutit eqqortuunersut oqaatigissallugu suli siusippallaalaarpoq, Tele nalunaarpoq.

Powered by Labrador CMS