Peqqissutsimut naalakkersuisut Nuummi atsioqatigiissapput

Ullumi ataatsimiinnermi peqataasut isumaqatigiissummik atsioqatigiinnissaat naatsorsuutigineqarpoq, nunani issittuni peqqissutsikkut siunissami suleqatigiinnissamik qulakkeerinnittumik

Peqqissutsimut Naalakkersuisoq Agathe Fontain aamma danskit peqqissutsimut ministeriat Bertel Haarder ataatsimiinnermik ingerlatsisuupput nunani issittuni ministerit aamma nunap inoqqaavisa kattuffiinit aallartitat peqataaffigisaanik ataatsimiisitsinermi. Assiliisoq: Leiff Josefsen

Ullumi pingasunngornermi nunani issittuneersut peqqissutsimut naalakkersuisut siullerpaamik ataatsimeeqatigiinneranni Nuuk ingerlatsiffiuvoq.

Peqqissutsimut Naalakkersuisoq Agathe Fontain aamma danskit peqqissutsimut ministeriat Bertel Haarder ataatsimiinnermik ingerlatsisuupput nunani issittuni ministerit aamma nunap inoqqaavisa kattuffiinit aallartitat peqataaffigisaanik ataatsimiisitsinermi.

- Peqqissutsimut tunngasutigut unamminartut amerlasuut assigiit issittuni nunat atugaraat. Nappaatit assigiit, ilaatigut qangatut inooriaatsip allanngorneranik pissuteqartut, Agatha Fontain ataatsimiinnerup aallartinnginnerani oqarpoq.

Aamma Bertel Haarderip ataatsimiinnissaq pissanngatigaa

- Oqaluuserisassat pissanganarput angusaqarusunnerlu erserpoq, oqallinnissarpullu pissanngatigaara nunat issittormiut akornanni innuttaasut peqqissusiat pitsaasumik angusaqarfigerusullugu suleqatigiinnissarput eqqarsaatigalugu. Qularutissaanngilaq immitsinnit ilikkagaqarluarumaarnissarput, Bertel Haarder oqarpoq.

Ataatsimeeqatigiinneq naggaserlugu isumaqatigiissummik atsioqatigiinnissaat naatsorsuutigineqarpoq, tassani siunissami nunat issittormiut peqqinnissaqarfiup tungaatigut suleqatigiinnissaannik qulakkeerinnittumik.

Powered by Labrador CMS