Innaallagissap akitsorujussuarnera akuerineqarsinnaanngilaq

Qeqqata Kommuniani innaallagissamik Nukissiorfiit akitsuinera borgmester Hermann Berthelsenip eqqumiigaa. Akitsuineq akuerineqarsinnaanngilaq, isumaqarpoq

Nukissiorfiit Qeqqata Kommuniani innaallagissamik akitsuinera eqqumiigineqarpoq. Foto: Carsten Lind

Akitsuineq Sisimiuni annertunersaavoq tassanilu akitsuineq paasiuminaatsinneqarluni.

- Erngup nukinganik nukissiorfittaaqqammerpugut, taamaammat innuttaasut, suliffeqarfiit kommunilu innaallagissap akikillinissaa naatsorsuutigisimavaat. Akerlianik akitsuineqarpoq kWh-mut 96 øre-mik, 206 kroner/kWh-imit 3,02 kroner/kWh-mut. Akitsuineq 47 procentit. Akuerineqarsinnaanngilaq, Hermann Berthelsen oqarpoq.

Taamani Sisimiut Kommunia januar 2007-mi Nukissiorfimmit taamanilu namminersornerullutik oqartussanit ilisimatinneqarput, erngup nukinganik nukissiorfimmi innaallagissap siunissamiu akia innaallagissiorfik naammassippat amerlanerpaamik 1,65 kroner/kWh-iussasoq. Maannali erngup nukinganik nukissiorfik naammassimmat akia neriorsuutiginenqartumik marloriaatingajammik qaffappoq.

Ilimasaarut pitsaanngitsoq

- Sisimiut saniatigut Tasiilaq innaallagissap akitsungaatsiarneranit eqqorneqarpoq, Ilulissanilu erngup nukinganik nukissiortik naammassippat aamma taama pisoqarssasoq naatsorsuutigineqartariaqarpoq. Erngup nukinganik nukissiortiit atulernerini innaallagissap akitsungaatsiarnera innuttaasunut ilimasaarutaavoq pitsaanngitsoq, Hermann Berthelsen isumaqarpoq.

Ullumi sisamanngornermi naalakkersuisumut akisussaasumut Jens B. Frederiksenimut allagaqarpoq akissuteqaqqullugu, ilaatigut Maniitsumi innaallagissap 26 procentinik akitsorneranut suut tunngaviunersut.

- Soorunami naatsorsuutigisimagaluarparput taama malunnaateqartigisumik akitsuinerup tunngavia kommunimut nalunaarutineqarsimanissaa, Qeqqatali Kommunia namminersorlutik oqartussanit tusarlerneqanngilaq, Hermann Berthelsen tusagassiuutitigut nalunaarummi erseqqissaavoq.

Powered by Labrador CMS