Niviarsiaqqat nukappiaqqanit imernerupput

Meeqqat 8-9- nik ukioqaliinnarlutik imigassamik misileraalertarput, tamanna apeqqarissaarutitigut immersugassatigut misissuinermi, kommunip ukluni kingullerni sisamani ingerlassimasaani, takuneqarasinnaavoq

9.-10. klassini atuartut afvfgaat imigasssaq misilissimavaat, tamanna apeqqarissaarutinik misissuinerup, kommunip quppernernimini nittartakkami tamanut saqqummiussaani, takuneqarsinnaavoq.

11-iniit 13-inut ukiulinnit niviarsiaqqat nukappiaqqanit amerlanerusut Nuummi imigassamik misileraalertarput, tamanna atuarneqarsinnaavoq Kommuneqarfik Sermersuup quppernerani nittartakkami allaaserisami, tassani innersuussutigineqarluni apeqqarissaarutitigut immersugassatigut misissuinerni, ukiuni kingullerni sisamani peqqissutsip pitsaaliuinerullu siuarsarnissaanut immikkoortoqarfiup ingerlassimasaani.

- Nukappiaqqat siulliullutik imertalertaraluarput. Siornali pissutsit allanngorput, paasigatsigu niviarsiaqqat nukappiaqqanit amerlanerusut siusinnerusukkut imertalertartut, siunnersorti Linda Petrussen, peqqissutsip pitsaaliuinerullu siuarsarnissaanut immikkoortoqarfimmeersoq, kommunip quppernerani nittartakkami allaaserisami oqaluttuarpoq.

Linda Petrussen allaaserisakkut paasissutissiivoq apeqqarissaarutit immersugassat aamma takutikkaat meeqqat 8-9-nik ukioqaliinnarlutik imigassamik misileraalersartut.

- 9.-10. klassimi atuartut affarpiaat imigassamik misiliisimapput. Nunanut avannarlernut allanut sanilliullugu tamakkunatut amerlatiginngillat, Linda Petrussen oqarpoq.

Kommuni malillugu immikkoortoqarfik illoqarfimmi atuarfinni 6. klassimiit 10 klassimut atuartunut tamanut imernermik, ikiaroornartutornermik naamaarnermillu akuttunngitsumik pitsaaliuinermik suliaqartartoq. Siunnersorti atuarfinnut pulaaraangami apeqqarissaarutinik immersugassanik nassartarpoq, atuartullu kinaassusertik isertorlugu immersortarpaat.

- Paasinarsivoq niviarsiaqqat nukappiaqqanit amerlanerusut imigassamik misileraalersartut. Ineriartorneq tamanna siorna paasiartulerparput. Nukappiaqqat siulliullutik imertalertaraluarput, Linda Petrussen kommunip quppernerani nittartakkami oqarpoq.

Peqqissutsip pitsaaliuinerullu siuarsarneranut immikkoortoqarfiup misissulerpaa sooq niviarsiaqqat siusinnerulutik imigassamik misileraalertarnersut. Kisitsisit allat aamma takutippaat niviarsiaqqat amerligaluttuinnartut aamma pinerluttalersimasut, kommunip quppernerani nittartakkami atuarneqarsinnaavoq.

Powered by Labrador CMS