Akissuteqarfigineqannginneq ilungersunarpoq
Arne Ib Nielsen suli palasitut atorfinikkusuppoq neriullunilu atorfiit inuttaqanngitsut arlaat piumaarlugu
Naak arlaleriarluni palasitut atorfinnut qinnuteqartaraluarluni taamaattoq Arne Ib Nielsen neriuuteqartuarpoq, tassami atorfinnut inuttaqanngitsunut tallimat ilaannut qinnuteqarniarpoq. Aamma tamanna pissaaq, naak arlaleriarluni palasitut atorfinitsinneqannginnerminut tunngavilersuutit suunerannik suli paasitinneqanngikkaluarluni.
Arne Ib Nielsen arlaleriarluni paasiniartaraluarpaa sooq Nunatsinni palasitut atorfinnut inuttaqanngitsunut qinnuteqartarnermini atorfinitsikkumaneqannginnerminut patsisaasoq suunersoq. Inuttut uannut tunngassuteqarpa, imaluunniit politikkimut tunngassuteqarpa? Akissuteqarfigineqannginneq ilungersunarpoq, sooq uanga Nunatsinni palasitut atorfinitsinneqarsinnaannginnersunga. Uannut kisimi tunngilaq, aamma ilaquttannut taamatut eqqunngitsumik pineqarnera sunniuppoq. Taamatut oqarpoq Arne Ib Nielsen, maanna atorfinnut inuttaqanngitsut ilaannut qinnuteqarnissaminut pilersaaruteqartoq.
- KIIIN-imut allagaqarpunga paaserusullugu Qaanaami atorfik kingullermik qinnuteqarfigisara sooq pinnginneriga paasiniarlugu. Paasivara Qaanaami ilagiit taasisinneqarneranni marluk taasisimanngitsut ataatsillu uanga taasimagaanga. Inatsimmi allassimavoq taasinerit allaffigineqanngitsut atorsinnaanngitsut, taamaattumik ataatsimik taaneqarsimaninni palasitut atorfinitsinneqaraluarpunga, kisianni naaminngooq, KIIIN oqarpoq, aamma naak uanga kisiartaallunga atorfimmut qinnuteqartuugaluarlunga, Arne Ib Nielsen oqaluttuarpoq.
Aamma ilisimavaa namminerminit annikinnerusumik ilinniagaqartut atorfinnut qinnuteqarfigisaminut atorfinitsinneqartartut. Arne Ib Nielsenillu eqqunngitsumik pineqarnini ilaatigut neriumajunnaarnikkut saqqummiunniartaraluarpaa. Kisianni iluaqutaanngilaq, apeqqummi akissuteqarfigineqarnissaanut kissaatiginerpaasaa suli akineqanngilaq: Sooq, sooq, sooq.
Palasitut atorfiit inuttaqanngitsut tallimat
Nunatsinni massakkut palasitut atorfiit inuttaqanngitsut tallimaapput. Qaanaami, Aasianni, Nanortalimmi, Uummannami aamma Tasiilami, kingullerni marlunni tamarmik immikkut ataatsimik palaseqareerpoq. Nunatsinni biskoppeqarfimmi allaffiup pisortaa Morten Nornild oqarpoq biskoppeqarfiup Namminersorlutik Oqartussat noqqaavigisimagai atorfiit pingasut inuttarsarsiuuteqqullugit. Arne Ib Nielsenimullu tunngasoq apeqqut, teologimi bacheloritut aamma pastoralseminariami (palasinngortussat atuarfianni) ilinniareersimasutut Nunatsinni palasitut sooq atorfinitsinneqarsinnaannginnersoq, biskoppeqarfik akivoq ”biskoppeqarfiup suliassanut ataasiakkaanut imaluunniit inunnut ataasiakkaanut tunngassuteqartut akissuteqarfigigajuttanngilai”.