Palle Christiansen: Air icelandimik isumaqatigiissut inuiaqatigiinnut iluaqutaavoq

Aningaasaqarnermut naalakkersuisoq Palle Christiansen isumaqarpoq Air Icelandimik isumaqatigiissut inuiaqatigiinnut iluaqutaasoq. Tamanna Siumut sinnerlugu Inatsisartunut ilaasortamut Kristian Jeremiassenimut akissutaani erserpoq, taannali Air Icelandimik isumaqatigiissutip kingunerisassai pillugit arlalinnik Palle Christiansenimut apeqquteqarpoq.

Kristian Jeremiassenip apeqqutai Palle Christiansenillu akissutai uani saqqummiuppavut.

AirIceland-imik Naalakkersuisut angallannissamik isumaqatigiissuteqarneranni nunatta karsiat qassinik akiliiva?

- Angalariaatsit allanngortinnagit Air Icelandimik isumaqatigiissut Nunatta Karsianut iluaqutaassaaq, Island aqqutigalugu angalasareernerit sipaarfiussammata.

- Angalariaatsit allanngortinnerisigut Nunatta Karsianut sunniutissai siulittuutigineqarsinnaanngillat apeqqutit inuiaqatigiit aningaasaqarniarnerinut tunngasut arlalissuit eqqarsaatigineqartariaqarmata. Tamatuma saniatigut Nunatta Karsianut sunniutissat eqqarsaatigalugit apeqqutaassapput Air Icelandip angallavinni aalajangersimasuni unammillerluni timmisartuussisalerneratigut aammalu timmisartuussisartunit allanit siunissami angallassisalersinnaannissat eqqarsaatigalugit Air Greenlandip aamma Mittarfeqarfiit qanoq iliorlutik naleqqussarnissaat.

Mittarfeqarfiinnut annaasaqaataavoq

Air Icelandimik isumaqatigiissut timmisartuussisarnerit eqqarsaatigalugit inuiaqatigiit aningaasaqarniarnikkut inissisimaneranut aallaaviatigut pingaaruteqannginnerusussatut nalilerneqarpoq tassunga ilanngullugu Mittarfeqarfinnut Nunatta Karsiata naatsorsuutaani suliffeqarfittut namminer-sortitatut ilaasumut.

Naatsorsuutigineqartariaqarpoq pisiortornissamik isumaqatigiissutigineqarsimasut ilaasut maannamit amerlanerusut Island aqqutigalugu angasalernissaannik kinguneqassasut. Tamanna Mittarfeqarfiit aningaasatigut isertitakinnerusalerneranik kinguneqarsinnaavoq timmisartut akunnillutik mittarnerinit ilaasunut akitsuutinit isertitarisartakkaminik annaasaqartalerneratigut. Taamaasilluni Mittarfeqarfiit-init nalilerneqarpoq, Island aqqutigalugu timmisartuussisoqartartillugu ilaasut akitsuutaanit kaaviiaartittakkatik ima annikilleriaateqassasut (DKK-inngorlugit naatsorsukkat):

Island aqqusaarlugu ilaasut 1.000 2.000 5.000 10.000

Annaasat – ukiuunnerani akitsuutit 522.080 1.044.160 2.610.400 5.220.800

Annaasat – aasaanerani akitsuutit 744.640 1.489.280 3.723.200 7.446.400

Maligiuk ukiuunnerani akiitsuutinit aasaaneranilu akitsuutinit kaaviiaartitat appariaataat assigiinnginnerat, ukiuunnerani aasaaneranilu akitsuusersuisarnerit assigiinngimmata.

Kaaviiaartitatigut annaasat siuliani saqqummiunneqartut anguneqassappata ullumikkut ilaasorineqartartut amerlassusaat taamaaginnartariaqarput. Mittarfeqarfiit kaaviaartittagaasa appariarnerisa kingunerissavaa ingerlatsinermut aserfallatsaaliuinernullu annertunerusumik tapiissuteqartariaqarnissaq imaluunniit Mittarfeqarfiit aningaasartuutigisartagai aamma/imaluunniit isertitarisartagai naleqqussartariaqarnissaat.

Angalasut amerlanerusut

Naatsorsuutigisariaqarpoq Atlantikoq qulaallugu timmissartuussisarnertigut unammilleqatigiinnerup annertusineratigut taamaasillutillu akit appariarnerisigut nunatsinnut angalasartut amerleriarnissaat. Tamanna inuiaqatigiit aningaasaqarniarneranut pitsaasumik sunniuteqassaaq soorlu takornariartitsineq eqqarsaatigalugu aammalu nunatsinni inuussutissarsiutinut allanut aamma Mittarfeqarfiit-inut. Ilanngullugittaaq isiginiarneqartariaqarput aatsitassarsiornikkut ineriartornerup kingunerisaanik pisariaqartitsinerit annertusiartornissaat.

Taamatut oqareerluni ilanngullugu oqaatigisariaqarpoq inuiaqatigiit aningasaqarniarneranut sunniutissat tassaammata timmisartuussisarnerit ammaaneqariartornerisa sunniutai, ukiuni kingullerni timmisartortitseqatigiiffiit allat nunatsinnut timmisartuusisalernissamik qinnuteqartartut akuerineqartalernerisigut. Taamaattumik Namminersorlutik Oqartussat Air Iceland-imik isumaqatigiissutaat timmisartuussisarneq eqqarsaatigalugu inuiaqatigiit aningaasaqarniarnerani ineriartornermut tamakkiisumut pingaaruteqanngitsutut isigineqartariaqarpoq.

Isumaqatigiissut qanoq sivisutigisumik atuutissava?

- Isumaqatigiissutip atuukkunnaarnissaa piffissalerneqarnikuunngilaq

AirIceland-imik isumaqatigiissuteqarnermi innuttaasut atorfiliunngitsut akikinne-rusumik angalasalissappat?

- Aap. Angalanernut Namminersorlutik Oqartussanit akilerneqartunit atorneqarsinnaassaaq. Atorfillit angalasarnerisa saniatigut qinikkat, ilinniagaqartut, napparsimasut il.il. isumaqatigiissut atorsinnaassavaat.

Air Greenlandimut annaasaqaataavoq

Air Iceland-imik isumaqatigiissuteqarnerup kingorna Air Greenland-imi suliassakin-nerulerneq pissutigalugu sulisunik soraarsitsisoqassava? - Air Greenland aningaasanik qanoq amerlatigisunik annaasaqassava?

Nalilerneqarpoq isumaqatigiissut namminerisaminik Air Greenlandimut sunniuteqassasoq, tassunga ilanngullugu sulisoqarnermut. Naatsorsuutigisariaqarpoq timmisartuussisarnikkut tamakkiisumik ineriartorneq amerlanerusut timmisartuussisalernerisigut Air Greenlandimut sunniuteqassasoq.

Air Greenlandip nammineq atorneqarani timmisartortitseqatigiinnit allanit Danmarkimut Island aqqusaarlugu siumut utimullu timmisartuussisoqartalerneratigut kaaviiaartittakkamigut annaasassani tullinguuttuni saqqummiunneqartuni naatsorsorsimavai ( DDK-inngorlugit naatsorsukkat):

Island aqqusaarlugu ilaasut 1.000 2.000 5.000 10.000

AG-mi kaaviaartitatigut annaasat 8.335.986 16.671.972 41.679.931 83.359.862

Tassunga tunngatillugu pingaaruteqarpoq erseqqissaatigissallugu kisitsisit saqqummiunneqartut tassaammata annaaneqarsinnaasut, taamaattumillu kisitsisit tassaanngitsut timmisartortitseqatigiiffiup naatsorsuutimini annaasassavii.

Niuernikkut aningaasarsiutaasut unitsinneqarput

Nunap iluani timmisartuussinermi akit qaffassappat?

Pisinermut isumaqatigiissut tamatumunnga annertunerusumik sunniuteqassanngitsutut nalilerneqarpoq.

Air Greenlandimi maannakkut akigitinneqartut tassaapput aqqutit niuernikkut aningaasarsiutaasut, Air Greenlandimut aqqutinit aningaasanik isertitsissutaanerusunit isertitat ilaat (assersuutigalugu Nuummiit Kangerlussuarmut/Kangerlussuarmiit Nuummut aqqut) aqqutinut isertitsissutaannginnerusunut (assersuutigalugu Nuummiit Paamiunut/Paamiuniit Nuummut aqqut) nuunneqartussanngorlugit.

Angalatitseqatigiiffiit arlallit ilaasussanik aalajangersimasunik ilaasussarsiornermi imminnut unammineranni niueqatigiinnerup iluani tamakkiisumik ammanerulersitsinerup kingunerisaanik aqqutinit isertitsiffiusunit iluanaarutinit aqqutinut isertitsiffiunngitsunut nuussisinnaaneq ullumikkutut ittoq ajornarsissaaq. Tamanna immini ajortup tungaanut ingerlanerunngilaq. Taamatulli ingerlasoqaratarsinnaanerata eqqarsaatiginissaa pingaaruteqarpoq.

Tamanna ima isumaqarpoq, aqqutini arlalinni maannakkut akigitinneqartut appartinneqarnerannik, soorunami aqqutini pineqartuni angalarusussutsimik ersersitsisuussapput, kisiannili aamma orninniakkat ilaannut akit qaffassinnaapput imaluunniit timmisartumik tikinneqartarnerit ikilillutik.

Akit naleqquttuunissaasa kiisalu timmisartuussinerit amerlassusaasa akuersaarnartumiinnissaasa qulakkeernissaat siunertaralugit kingunerisaasa ilagisinnaavaat Nunap Karsiata ullummikkornit amerlanerusunik angalanermi orninniakkat ilaannut kiffartuussinermik isumaqatigiissusiortariaqalersinnaaneranik. Piviusorsiorpalaarneruvorli kiffartuussinermik isumaqatigiissutit pillugit aalaja-ngernerit ingerlatseqatigiiffinni siulersuisunit aalajangerneqaratik angallassiffinnilu aningaasarsiutaasuni sinneqartoorfiit sinneqartuunngitsunik matussusiisarnerat pinnagit aningaasanut inatsisikkoorlugit ammasumik ingerlanneqarpata. Akit angallaffinni kiffartuussinermik isumaqatigiissusiorfigineqarsimasuni (nunap immikkoortuini timmisartuussinermiunerusoq) isumaqatigiissummit kalluarneqassanngilluinnarput, kiffartuussinermut isumaqatigiissutit tamavimmik toqqaannartumik Nunap Karsianit aningaasalersorneqarmata.

Aningaasartuutikinnerulerneq

Nunanut allanut angalanermi aamma atorfiliunngitsut angalanissaannut akikillisaa-nissamik pilersaaruteqartoqarpa?

- Naalakkersuisut aallaavittut Namminersorlutik Oqartussat sinnerlugit pisiniartarnermi isumaqatigiissusiorsinnaapput. Siusinnerusukkut oqaatigineqareersutut, angalanerit Namminersorlutik Oqartussanit aningaasalersorneqartut isumaqatigiissutaasimasup iluaniimmata, tassa atorfillit, politikerit, ilinniartut, napparsimasut il. il. angalaneri.

Naalakkersuisut annilaangatiginngilaat aningaasat avammut annissorneqartut amer-linissaat Air Iceland-imik isumaqatigiissuteqarnerup kinguneranik?

Naamik, Namminersorlutik Oqartussat isumaqatigiissummik atuineratigut angalanermi aningaasartuutikillisaanissaat siunertaasimavoq.

Air Iceland isumaqatigiissusiortoqanngikkallarmalli Namminersorlutik Oqartussanit angalanermut atatillugu atorneqartarsimavoq. Taamaattumik angalanernut ataatsimut aningaasartuutit annikillisarneqarnerat aningaasaqarnikkut imminut napatissinnaanerunissap pitsaanerusumik tunngavissinneqarnissaatut isigineqarpoq, Palle Christiansen oqarpoq.