IA: Air Iceland-mik isumaqatigiissut kukkuneruvowq

Aningaasarsiornermut Naalakkersuisup Air Icelandimik isumaqatigiissuteqarnera Inuit Ataqatigiit isumaqatiginngilluinnarpaat.

Atorfilittat allallu sulinermut atatillguu angalasut bilitsit ataasiakkaat Air Greenlandimut naleqqiullugu Air Icelandimi akikinneruneri peqqutigiinnarlugit inuiaqatigiit aningaasarsiornerat eqqarsaatigalugu kukkunerullinnarpoq, IA isumaqarpoq. Foto: Leiff Josefsen

Air Icelandimi isumaqatigiissut assortuussutaasoq pillugu Kuupik Kleistip oqaaseqarnissaa ullunik pingasunik sioqqullgu IA'p politikkikkut oqaaseqartartuata Aqqaluaq Biilmann Egedep isumaqatigiissummut partiip isumaa saqqummiuppaa.

Aqqaluaq Biilmann Egedep Palle Christiansenip tunngavilersuutai upperinngilai, isumaqarporlu innuttaasut siunissami atugarissaarnissaannut IA'p anguniagai akornuserneqartut.

- Tunngavilersuutaavoq allaffissornermi atorfillit angalanermi aningaasartuutaat ikilisinneqassasut. Taamattaaq aningaasarsornikkut EU-mik isumaqatigiissut tunngavilersuutigineqarpoq. EU-milli isumaqatigiissut IA'p ima paasivaa, inuiaqatigiinni aningaasarsiorneq eqqarsaatigalugu iliortarnissatsinnut pisussaaffeqartugut, Aqqaluaq Biilmann Egede oqarpoq.

- Ilisimaneqartutut Naalakkersuisut Angallannermut Ataatsimiititaliamik pilersitsisimavoq, suliassaraallu Kalaallit Nunaanni attaveqaatitigut atukkagut eqqarsaatigalugit aaqqissuussinerit unammilligassallu misissoqqissaarnissaat. Ataatsimiititaliap suliai naammassinngitsulluunniit taama aalajangiisoqarpat, allannguutaasinnaasullu tunngavii suli saqqummiunneqanngitsut, kukkusumik aalajangiisarnerit qalligaluttuinnarput, Aqqaluaq Biilmann Egede isumaqarpoq.

- Timmisartunut bilitsit atuuttut immikkut isigerusunngilagut, inuiaqatigiilli aningaasarsiornerat Kalaallillu Nunaanni ataqatigiissitsinerit pingaartikkatsigit. Taamaammat isumaqatigiissummut akerliunerput allanngortinneqarsinnaanngilaq, suliffeqarfinnut assigiinngitsunut pitsaanngitsunik kinguneqartussaammat kiisalu Kalaallit Nunaanni aningaasarsiornikkut ataqatigiissutit aningaasallu ingerlaartinneri, Aqqaluk Biilmann Egede isummerpoq.

Powered by Labrador CMS