GA-mi ilaasortat amerlipput
Inuussutissarsiutigalugu angallatit pillugit Kalaallit Nunaanni Sulisitsisut Peqatigiiffiat, GA, ataatsimiititaliorpoq
Nunatsinni inuussutissarsiornermi kattuffinnut ilaasortaarusunneq ukiuni makkunani annertusiartorpoq. Februaarip 24-ani inuussutissarsiutigalugu angallataatillit peqatigiiffittaarput. Tamanna pivoq Kalaallit Nunaanni Sulisitsisut Peqatigiiffianut, GA-mut, atasumik inuussutissarsiutigalugu angallannermik suliaqartut assigiinngitsut oqallittarfissaqartinniarlugit, tassuuna taamatut inuussutissarsiorneq inuussutissarsiutivittut ingerlanneqarnissaa ilaatigut anguniarlugu. Taamatut GA tusagassiuutitigut nalunaaruteqarpoq.
- Ilaasortat inuussutissarsiutini assigiinngitsuneersuummata tamanna nalinginnaasumik GA-mi suliamut attuumassuteqartumut ataatsimiititaliatut taamatullu GA-mut attuumassutilittut sinniisoqarfittut isigineqassanngilaq, taamatut oqaluttuarpoq GA-p allattoqarfiani pisortaq, Karsten Klausen, tusagassiuutitigut nalunaarummi taamatut allappoq.
- Oqallittarfimmik pisariaqartitsineq annertusiartuinnarpoq, tassani soqutigisat ataatsimoorfigisat oqallisigineqartarfissaannik. Soorlu inatsisiliornermut aamma inatsitigut atugassarititaasut pillugit. Inatsisinik tunngaveqanngitsumik angallassisarnermi ajornartorsiutit ingammik qitiutinneqassapput. Taakku saniatigut peqatigiiffeqarnermi ajornartorsiutit oqalligisineqassapput, isumassarsisitseqatigiinnissaq aamma misilikkatigut paarlasseqatigiittarnissaq oqallisigineqassapput.
Ataatsimiititaliap aamma allattoqarfiup sulissutigissavaat suliffeqarfiit tamarmik inuussutissarsiutigalugu angallannermik suliaqartut GA-mi ilaasortanngornissaat, taamaaliornikkut malittarisassat assigiit aamma taamatut inuussutissarsiornermi pissutsit pissusissamisoortut atugaalerniassammata. Suliamut attuumassuteqartumut ataatsimiititaliaq nutaaq pisortanit tusarniaaffigineqartartussatut inissisimassaaq, taamatullu inuussutissarsiornerup ineriartortinneqarneranut akuerisaaneranullu oqartussaassuseqassalluni. Ataatsimiisitaliaq aamma taamatut inuussutissarsiuteqartut avammut oqaaseqartartorissavaat, pisortanut sanngisuunerunissaq anguniarlugu. Ilaatigut Nautisk Udvalgimi pisortatigoortumik ilaasortaalernissaq sulissutiginiarneqassaaq.
15-inik ilaasortaqarallarpoq, ataatsimiititaliortoqarporlu taamatut suliaqarnermut tunngatillugu GA-p iluani taakku sinnerlugit ilaasortaqartumik. Ataatsimiititaliaq pingasunik ilaasortaqarallarpoq. Tassaapput Bo Lings, Søren Lyberth aamma Mike Høegh, ataatsimiititaliarlu inissitsiterpoq Mike Høegh siulittaasoralugu.