"KANUKOKA nutaaq" ilusilersorneqalerpoq

Kanukokami kommunit toqqaannartumik suliassaannik sullissisarneq unitsinneqassaaq, siulittaasoq ilisimatitsivoq

Martha Abelsen: - KANUKOKA kommunit suliassaannik sullisuunani pikkorissartitsisarnernik neqerooruteqartassaaq. Assiliisoq: Leiff Josefsen

Politikkikkut aaqqissugaanerup allanngortinneqarnissaanik oktobarimi aallartitat immikkut ittumik ataatsimiinneranni aalajangiinerit kingunerisaannik, siulersuisullu nutaat marlussoriarlutik ataatsimeereernerisigut, ”KANUKOKA nutaaq” pillugu isumaliutit ilusinikkiartuaalersut aammattaaq allattoqarfiup ingerlatsineranut tunngatillugu. Taamatut ilisimatitsivoq KANUKOKAmi siulittaasoq Martha Abelsen tusagassiuutitigut nalunaaruteqarluni.

- Kalaallit Nunaanni Kommunit Kattuffiata nunatsinni qitiusumik oqartussanik, tassa imaapoq Namminersorlutik Oqartussanit, kommunit ataatsimoorlutik isumaqatiginninniartarnerannik aaqqissuussinermi maannamut atuuttumi sakkussatut nukittuutut inissisimanissaa kattuffiup siulersuisuisa pingaartittorujussuuaat, siulittaasoq erseqqissaavoq.

- Siulersuisulli oqaatigaat nukittussagaanni qanoq angissuseqarneq tamatigut apeqqutaasariaqanngitsoq. Apeqqutaaneruvoq suliassat qanoq pingaarnersiorneqarnersut. Taamaalillutik kommunit kattuffimmut ilaasortaanerminnut akiliutaat ukioq mannamiit 20 procentinik ikilineqarsimapput. Allattoqarfillu Nuummiittoq suliassanik pingaarnersiuilereersimavoq, ilisimatitsivoq.

- Tamatumunnga naapertuuttumik siulersuisut kingullermik ataatsimiikkamik aalajangerput KANUKOKAp suliassatigut ataasiakkaatigut kommuninut toqqaannartumik sullissinera unitsikkiartuaarneqassasoq.

- Aammattaaq kommunini sulisut politikerillu pikkorissarneqartarnerannik ineriartortitseqqinnissamut periarfissanik allattoqarfimmi maanna siunnersuusiortoqarpoq, taamaalilluni suliassaqarfik kattuffiup siornatigut aallutarisimasaa ingerlanneqaleqqissinnaaniassammat, siulittaasoq tusagassiuutitigut nalunaarummi allappoq.

2010-mi oktobarimi aallartitat immikkut ittumik ataatsimiinneratigut KANUKOKAp politikkikkut ingerlatsinera kommunit aaqqissuussaaneranni nutaami pisariaqartitsinermut naleqqussarneqarpoq. Aallartitat ukiumoortumik ataatsimiittarnerat atorunnaarsinneqarpoq, tamatumunnga taarsiullugu kommunalbestyrelsinut qinersisoqareerneratigut ataasiarlutik ataatsimiittassallutik. Kiisalu borgmesterit sisamaasut siulersuisuni aalajangersimasunik inissaqartinneqalerput politikkikkut ataqatigiissaarineq nukittorsarumallugu.

Kommunit suleqatigiiffiata aaqqissuussaanermigut allanngortiterneqarnera 2012-imut missingersuutit oktobarimi aalajangersarneqarnerannut atatillugu naammassiniarneqartoq, Martha Abelsen ilisimatitsivoq.

Powered by Labrador CMS