Nuummi peqqissaavik nutaaq

Peqqissutsimut Naalakkersuisup Agathe Fontainip peqqinnissaqarfiup illutaa kanngussaasoq nutaaq marsip ulluisa pingajuanni 2011 atuisussanut tunniutissavaa. Illuummiipput Nuummi peqqissaavik nutaaq Dronning Ingridip Peqqissaavianik taaguuserneqartoq kiisalu Nuna tamakkerlugu Nakorsaaserisoqarfik, taamatut nalunaarpoq Peqqissutsimut Pinaveersaartitsinermullu Aqutsisoqarfik tusagassiuutitigut nalunaaruteqarlutik.

Peqqinnissaqarfik inissisimaffiusup avatangiiserisai isumassarsiorfigalugit sanaajuvoq, tassa: Kangerlummi sikorsuit, qaqqat seqerngullu tarrikkiartortarnerata pikkunassusia. Sanaartorneq A. P. Møller og Hustru Chastine Mc-Kinney Møllers Fond til almene Formaalimit kiisalu Namminersorlutik Oqartussat namminneq aningaasaataannit aningaasalersorneqarpoq illussanillu titartaasartoqarfimmit C. F. Møllerimit titartagaalluni.

1.500 kvadratmeterit pilersaarutip peqqinnissaqarfimmik nutarsaaviusussap siunissamullu qularnaariffiusussap immikkoortuisa siulleriinnarpaat. Immikkoortup tullia tassaassaaq nukinginnartunut saaffiginnittarfik kiisalu pilattaasarfiit nutaat nutaaliaasunillu atortullit tallimat, tusagassiutitigut nalunaarummi ersersinneqarpoq.

Sulisut ulluinnarni illumiittartut saniatigut peqqinnissaqarfimmi, aningaasaateqarfimmilu qitiusumik inissisimasut najukkameersullu ammaanersiornermut qaaqquneqarput. Ukiup ingerlanerani kingusinnerusukkut illoqarfimmi innuttaasunut takuniaanissamut ammatitsisoqarumaarpoq.

Pilersaarutaavoq Kurt Nielsenip Peqqissutsimut Pinaveersaartitsinermullu Aqutsisoqarfimmeersup, Jesper Olesenip Sermersuumi nunap immikkoortuani Peqqinnissaqarfimmi nakorsap, Klaus Hyttelip C. F. Møllerimi suleqataasup, kiisalu Agathe Fontainip Peqqissutsimut Naalakkersuisup oqalugiarnissaat. Erinarsoqatigiit Nipe aliikkusersuissapput ininullu takornariartitsisoqassalluni.