Danskit naartuersinnermi piigaat ikuallaasarfimmut marrarnullu pisarput
Naartoq peerneqareeraangat sumut pisarnersoq assigiinngitsorujussuarmik akissutissaqarpoq. Etisk Råd assigiimmik pineqartarnissaannut piumasaqarpoq.
Danmarkimi ukiumut 16.000-t naartut naartuersinnikkut peerneqareeraangata qanoq pineqartarnerat aaqqissuussaanngitsumik nalaatsornerinnarmillu pineqartarput. Napparsimavimmi arlalinni naartut peersitat inuup pisataatulli peersitatut allatulli pineqartarput ikuallaasarfimmi ikuallanneqartarlutik. Allat napparsimaviit toqusinik ikuallaasarfimmi ikuallatsittarpaat arsaalu marrarmut ikillugit iliveqarfimmi ilineqartarlutik.
Taamatut allaaserisaqarpoq Kristeligt Dagblad tallimanngornermi.
Etiske Rådimi ilaasortat arlaqartut isumaqarput akuerineqarsinnaanngitsumik assigiinngisitsisoqartoq.
- Assigiimmik periuseqartoqartariaqarpoq, tamannalu pisassaaq peqqinnissaqarfimmi atorfillit aamma politikerit oqaloqatigiinnerisigut, taamatut oqarpoq Etisk Rådimi siulittaasoq, lektor Jacob Birkler, aamma peqqinnissaq pillugu pissuserissaarnissami ph.d.-usoq.
Herlev Hospitalimi naartu piikkap ipiutaasartai boksinut ataasiakkaanut katersorneqartarput, toqusut ikuallaasarfianni illerfimmut ileriarlugit ikuallanneqartarlutik marrarlu arsaannik imaqartoq iliveqarfimmi Gladsaxe Kirkegårdimi ilineqartarlutik. Taamatut aaqqissuussisoqarpoq napparsimaviup palasiata Tom Kjærip suliniuteqarneratigut. Taassuma ajornartorsiutitut isigaa napparsimaviit assigiimmik malittarisassaqannginnerat.
- Oqarnianngilanga uagut aaqqissuussinerput tamani atorneqassasoq, kisianni aaqqiisoqartariaqarpoq, tassani inuiaqatigiit tamatuminnga naleqqussaasariaqarput, imaanngitsoq napparsimaviit ataasiakkaat eqqortuusorisaminnik aaqqiisassasut, taanna oqarpoq.
Folketingimi peqqinnissamut ataatsimiititaliami siulittaasoq, Preben Rudiengaard, (V), ataatsimut aaqqiisoqarnissaa taperserpaa.
- Tamatuma ajornartorsiutaanera malugisimanngilara. Isumaqarpungali assigiimmik iliuuseqartarnissaq pisariaqartoq, tamannalu napparsimavinnut erseqqissaatigineqartariaqarpoq, immaqa Sundhedsstyrelsenimit. Ileqqorissaarnissaq eqqarsaatigalugu isumaqarpunga naartu piigaq inuttutullusooq isigineqartariaqartoq, taamaattumillu iluamik pineqartariaqartoq, Kristeligt Dagbladimut oqarpoq.