Ruslandimi VM-ernermi kalaallit erfalasut

Kalaallit unammeqataasussat Aqqaluartaa Olsen, Kristian Kristoffersen aamma Øystein Slettemark illoqarfimmi Khanty Mansiyskimi, Ural qaqqaasa kangianniittumi, Sibiriami asimi isorartoqisumiittumi, arfininngornermi unamminissamut piareerput.

Angutit ujakkaartartut allat 120-t nunani allani 40-t sinneqartuneersut peqatigalugit Aqqaluartaa Olsen, Kristian Kristoffersen aamma Øystein Slettemark nunarsuatsinni ujakkaarnermi ooqattaasartartut pikkorinnerpaanut unammissapput.

Kalaallit peqataasussat arfininngornermi siullermik unammeqataassapput (10 km) marlunngornermilu unammeqqissallutik (20 km), taamatut ilisimatitsivoq Kalaallit Nunaanni Biathlonertartut kattuffiat, tusagassiuutitigut nalunaarummi.

- Maani peqataalluni nuanneqaaq, tulluusimaarnarporlu kalaallit erfalasuat takusinnaallugu illorsuarni, stadionimi aamma hotelitta silataani. Ammaanersiornermi alutornaqisumi kalaallit erfalasuata eqqunneqarnera kusanaqaaq, Øystein Slettemark, ujakkaartartuutigaluni peqataasunut aqutsisuusoq, oqaluttuarpoq.

Khanty Mansiysk Ruslandimi ujakkaarnermi ooqattaasartartuni qitiuvoq, tamaanilu timersuut tamanna nuannarineqarluarpoq. Sapaatit akunnerata naanerani unamminissami isiginnaariat 20.000-t sinneqartut naatsorsuutigineqarput.

Unamminerit tamarmik toqqaannartumik aallakaatitsinikkut Europami nunanut assigiinngitsunut takutinneqassapput, Kalaallit Nunaannilu Eurosportimi, neriuppugullu KNR-ikkut (siornatigutulli norgemiut aallakaatitassiaat takutissagunikkit) unamminerit toqqaannartumik isiginnaarneqarsinnaapput.

Aamma unamminerit malinnaavigineqarsinnaapput internet aqqutigalugu ugguuna www.biathlonworld.com .

Khanty Mansiyskimi ileqqumisut issippoq anoraalu nillerluni. Ullut tamaasa seqinnertarpoq, uanili sapaatit akunnerata naanerani nittaannissaa ilimagineqarluni, Øystein Slettemark ilisimatitsivoq.

Naak kalaallit VM-ernermi peqataatitaat aatsaat taamak amerlatigigaluartut, taamaattoq allanut sanilliullugit ikittuinnaapput. Naalagaaffiit anginerit angutinik arfineq pingasunik arnanillu aamma arfineq pingasunik kiisalu aqutsisunik 20-nik peqataatitaqarput. Kisianni arlaannaalluunniit sisamanit amerlanerusunik unamminernut ataasiakkaanut tamanut peqataatitaqarsinnaanngilaq.

Kalaallit Nunaanni Biathlonertartut kattuffiat angalavoq tamakkiisumik aqutsisussanik ilaasoqarani.

- Sisoraatinut pujassaatiliorfiup Swix-ip sullinniarpaatigut sisoraatigut pujassartarniarlugit, aamma canadamiup, New Zealandimiunut aqutsuusuugaluartup, ooqattaasartarfimmi ikiorniarpaatigut. Ingerlaarfissamut isorartuumut atatillugu neriuppugut naalagaaffiit allat suleqatigisinnaassallugit aqqutaani imigassaqartarnissarput pillugu, minnerunngitsumillu ooqattaasartarnermi nalunaartarnissamut atatillugu, tamannami pingaaruteqarluinnarmat unamminerni isorartuuni, Øystein Slettemark oqarpoq.