SUME bilitsit pilernguppaat

Den Nordatlantiske Brygge, Københavnimiittoq Kalaallit Nunaanni nipilersortartut marloriarlutik tusarnaartitsinissaannut soqutiginnittoqaqaaq

SUME Nunatsinniinnaangitsoq tusarnaartitsigaangami ulikkaartitsisarpoq, aammattaaq Danmarkimi nuannarinnitsinik ulikkaarpoq. Una asseq Nuummi decembarimi 201o-mi tusarnaartitsineranni assiliisaavoq. Assiliisoq: Leiff Josefsen

Arlalippassuit pisereerput kisianni SUME Den Nordatlantiske Bryggemi marloriarlutik tusarnaartitsinissaannut tallimanngornermi 29. aamma arfininngornermi 30. apriili bilitsimik pissarsiniaruit utaqqivallaassanngilatit. Tusarnaartitsinissamummi bilitsit assorsuaq pilerigineqarput, naak suli qaammatit marluugaluartut nipilersortartut Københavnimi tusarnaartitsinissaannut.

- Bilitsinik tuniniaaneq assorsuaq ingerlalluarpoq. Bilitsit 600-sut affaat maannakkut tunineqareerput. Tamanna ajunngilluinnarpoq tusarnaartitsinissap pisinissaa taamak ungasitsigisoq eqqarsaatigigaanni. Eqqoriarpara tusarnaartitsinernut marlunnut bilitsit tamakkerlutik tunineqarnissaat, taamak oqarpoq Asta Stefandottir, Den Nordatlantiske Bryggemi suliniutinut pisortaq.

Tusarnaartitsinernut marlunnut tamanut 300-t inissaqarput. Bilitsi siusinaartumik pisiaralugu 180 koruuninik akeqarpoq isilernermilu aamma 180 koruuninik akeqarluni, taamanikkumut utaqqinissaq sapinngikkaani iluatsitsinissarlu qunuginagu, tamannami ullut ingerlatillugit ilimarunnaariartuinnarpoq.

Powered by Labrador CMS