Future Greenlandimut 300 pallillugit peqataassapput

Kalaallit Nunaanni Sulisitsisut Peqatigiiffiata inuussutissarsiutinik ingerlatsisunik isumasioqatigiissitsinerata Future Greenland 2011-ip: People, Planet, Profit, Katuami 16. 17. marsi ingerlanneqartussap iluatsilluarnissaa ilimanarpoq. Pilersaarut ilisimaneqarluartunik amerlasuunik peqataaffigineqartussaq assorsuaq soqutiginnilersitsisimavoq.

- Isumasioqatigiinnermi matumunnga assingusumik 2009-mi 250-t peqataapput, naatsorsuutigisarput qaangerujussuarlugu kisianni maannakkut amerlanerusut anguvagut, Ellen Arnskjold GA-meersoq oqaluttuarpoq.

- Ullunut taakkununnga marlunnut 300 missarluinnaat peqataaniarlutik nalunaaruteqarput pilersaaruterput assigiinngiiartunik imalik tulluusimaarutigaarput. Siullertut saqqummiussisussat CSR-imut tunngatillugu ilisimasaat pitsaalluinnartuupput, aappasaattullu saqqummiussinerit worskshopsinik assigiinngitsunik amerlasuunik malitseqarput, taakkunani sammineqarlutik maani misilittakkat taamaattumillu sammisat piviusunik kalaallit akornanneersunik ilaqarput, Ellen Arnskjold Kalaallit Nunaanni Sulisitsisut Peqatigiiffianeersoq oqaluttuarpoq.

Future Greenland isumasioqatigiinneq tassaavoq aqutsinermi pingaarnersiuinernik, inuiaqatigiinni suliffeqarfiit ineriartortitsinissaannik piorsaanissaannillu qulakkeerinnittussanik samminiffiusoq.

Kalaallit Nunaanni suliffeqarfiit inuiaqatigiinnut peqaallutik inooqatigiinnikkullu akisussaassuseqarlutik suligajupput. CSR, Suliffeqarfiit Inuiaqatigiinnut Akisussaaqataanerat, periusissatut atorlugu sulinermi amerlasuunut niuernikkut iluaqutaasarmat, nunarsuarmut tamarmut, nunanut ataasiakkaanut najukkanullu sunniutaasa aallaaviginissaat qinersimavarput.

Inuiaqatigiinnut akisussaanneq eqqartorneqaraangat suliffeqarfiit inuiaqatigiillu ataatsimoorullugit naleqartitaannik pilersitsinissaq pineqartarpoq. Inuiaqatigiinni ajornartorsiutit aaqqiivigineqarnissaannut suliffeqarfiit akisussaaqataallutik suleqataasarput – ilutigalugu suliffeqarfiup suliassaqarneranut iluaqutaasumik. Suliffeqarfiit ataasiakkaat namminneq aalajangertarpaat kajumissutsiminnik suliaqarnissartik qanoq annertutigissanersoq – aammalu suliniutit suut suliffeqarfiup suliaanut pingaaruteqarnersut apeqqutaatillugu. Assersuutigalugu sammisat makkuusinnaaput, inooqatigiinnermut tunngasut, silap pissusaa, avatangiisit, peqquserluttuliornermik akiuiniarnerit il.il..

Allatut oqaatigalugu CSR tunngavigalugu suliaqarniaraanni suut sammineqarnersut apeqqutaasorujussuuvoq, tassalu suliffik suunersoq apeqqutaalluni aallutat assigiinngitsuullutik, suliffiup sunik suliaqarnera, suliffeqarfiup angissusaa il.il.. Tamakku ulluni marlunni qulaajarneqassapput saqqummiisoqarneratigut aammalu eqimattakkuutaani assingiinngitsuni sulisoqarneratigut.

Naalakkersuisut Siulittaasuat Kuupik Kleist isumasioqatigiinnermik ammaasuussaaq, saqqummiussisussat tassaapput Mads Øvlisen, CBS-imi professori, Alfred Josefsen, Irma, Maarten van Engeland ISS-imit, borgmester Asii Chemnitz Narup, professor Minik Rosing, Københavns Universitet, Mikael Thinghuus, Royal Greenland, Martin Kviesgaard, Grønlandsbanken, Jeremy Brooks, Transparency Inernationalimeersoq aamma Christian Stadil, Enso Consultimeersoq.

Isumasioqatigiinnermi pilersaarut takuneqarsinnaavoq uani

Pisataarusukkaanni pilertortoqartariaqarpoq sulimi arlalialunnguanut inissaqarmat, Ellen Arnskjold ilisimatitsivoq, ulluni makkunani - kalaallit suliffeqarfiutillit allat peqatigalugit aatsitassarsiorneq pillugu nunarsuaq tamakkerlugu peqataaffigineqartumi PDAC-imi - Torontomi peqaataasoq.

Nuup mittarfiani timmisartumik ajortoortoqarnera pissutigalugu angalaqatigiittussat kinguaattoorput, taamaattumillu Nuummiit Eqalunnut sapaatiummat ullaakkut timmisartumut attartukkamut ilaallutik aallarput, ataasinngorneq 7. marsi Torontomeereernissartik qulakkeerniarlugu, ulloq taanna Greenland Day ingerlanneqartussaammat.