Nersornaat nutaaq: nersornaat Arnarulunnguamik taaguutilik
Ukiut tamaasa arnat ulluanni martsip arfineq-pingajuanni nersornaat Qaqortumi arnamut tunniunneqartassaaq.
Qaqortumi arnat suliniarluartut ukiut tamaasa nunarsuarmi tamarmi arnat ulluanni aaqqissuussisarput, tamatumunngalu atatillugu illoqarfimmi arnamik nersornaasiisarniarput. Taamatut allaaserisarpoq Kujataamiu ullumi.
Sermitsiaq.AG-p tamatuminnga suliniuteqarlutik aallarniisut ilaat oqaloqatigaa.
- Ukiuni kingullerni marlunni pisutsitsisarnernik arpatsitsisarnernillu aaqqissuussisarpugut, taamaaliornikkut ullormi tassani naapeqatigiittarluta, naatitanik paarnanik najugassartaannillu nerillutalu najugassartornitta saniatigut agguaatatsinnik eqquiniaasitsisarluta eqquisut makittarlutigik. Unnukkut hotelimi naapeqatigiittarpugut, tassani arnat arlaqartut assassugaannik, eqqumiitsuliaannik ilusilersugaannillu saqqummersitsisarluta. Tamatuma kingorna nereqatigiittarpugut, aliikkusersuisoqartarluni, erinarsortoqartarluni, taamatut nuannersumik ataatsimooqatigiittarluta, nersornaasiisalernissamut aallarneeqataasut ilaat, Amma Knudsen Qaqortumeersoq, oqaluttuarpoq.
Nersornaat Arnarulunnguamik taaguutilik siullerpaamik marlunngorpat 8. marts unnukkut aaqqissuussinermi tunniunneqassaaq.
- Nersornaatip Arnarulunnguamik atserneranut pissutigaarput oqaluttuarisaanitsinni arnaq taanna ilaammat pingaaruteqartutut isigineqartariaqartutut. Knud Rasmussenip ilisimasassarsiornerani peqataanerani qanoq inissisimanera tusarpallaarneq ajorparput. Nerisassiortarpoq atisallu suliaralugit, ilisimasassarsiornermi inuttut pingaaruteqarluinnartuuvoq, kisianni tassa angutit kisimik kingornatigut nersorniarneqartarput. Ukiuni kingulliunerusuni Arnarulunnguup qanoq iluaqutaatigisimanera eqqaaniarneqartalerpoq, Amma Knudsen oqarpoq, ilassutigalugulu eqqaavaa arnat salliutinniarneqarnerusariaqartut.
- Tassannga nersornaammik arnap inissisimanera pingaaruteqarneralu, suliaqartarnera nukittoqutaasarneralu arnaqatitsinnut nittarsaanniarparput. Pisortat oqartussaasut arnat nersortariaqartut nersornaasiiniaraangamik pingaartippallaarneq ajorpaat.
Arnat angusaqarusulluartut, arnat pingaaruteqarluartut aamma ineriartornermi malinnaalluartut arnaq nersornaammik Arnarulunnguamik taaguutilimmik siullerpaamik nersornaaserneqartussaq toqqassavaat.
- Arnat taakku illoqarfimmi arnarpassuit sinniisoraat, ukioqarput 20-niit 70-it tungaannut. Toqqaanissaminnut suliassaqarput pingaaruteqarluinnartumik, Amma Knudsen oqarpoq.