Sisimiuni ajunaarluni toqusoq

Sisimiuni sulisartoq assartugalerisoq 45-nik ukiulik Irena Arctica lastimut 16 meterinik portutigisumiit nakkarnermi kingorna toquvoq

Sisimiuni sulisartoq assartugalerisoq 45-nik ukiulik Irena Arctica lastimut 16 meterinik portutigisumiit nakkarpoq. Asseq: Sermitsiaq

Arfninngormat unnukkut sulsartoq assartugalerisoq 45-nik ukiulik Royal Arctic Linep containerersuutaani Irena Arcticami lastimut nakkarpoq. Ajutoorneq pivoq umiarsuup usingiarneqarnerani. Politiit pisoq pillugu qulingiluat qeqqata missaani nalunaarfigineqarput tamatumalu kinguninngua angut napparsimavimmut apuunneqarami toqoreersimavoq.

- Suli pisimasoq misissuiffigaarput kisianni paasisinnaavarput pinerluttuliortoqarsimanngitsoq. Suli susoqarsimanera tamakkerlugu suna tamaat qulaakkiinngilarput, kisianni maannamut misissuinitta paasinarsisippaa tamanna ajutoornermik tunngaveqartoq. Angut umiarsuarmik containerersuumik usingiaasoqarnerani sulitilluni 16 meterinik portutigisumit nakkarsimavoq, Qeqqarni nunap immikkoortuani pisortaq Johan Davidsen Sisimiut politiinit oqarpoq.

Royal Arctic Linemi attaveqaqatigiinnermut pisortap Jakob Strømip toqusoqarsimanera uppernarsarpaa oqaluttuarlunilu pisimasoq oqartussaasunit misissorneqartoq.

- Ajutoornerup kinguninngua politiit killisiuinerit siulliit ingerlappaat naatsorsuutigaarpullu suliaq Søfartsstyrelsenimut ingerlateqqinneqassasoq, tamatumalu kingorna Sullivinnik Nakkutilliisoqarfimmut. Kisianni misissuisoqarmat Royal Arctic Linep tungaanit maannakkorpiaq annertunersumik oqaaseqarsinnaanngikkallarpugut, Jakob Strøm oqarpoq.

Powered by Labrador CMS