Kalaallit Nunaanni isertitsivinniittut katsorsaneqarlik
Lars-Emil inatsisinut atuutsitsinermut ministerimut allagaqarpoq nunatsinni pinerluuteqarsimasunut isertitsivinniittut atornerluinnerminnut katsorsarneqartalernissaat atuutsileqqullugu
Folketingimi ilaasortaq Lars-Emil Johansen, Siumut, ullumi inatsisinut atuutsitsinermut ministerimut Lars BArfoedimut allagaqarpoq nunatsinni pinerluuteqarsimasunut isertitsivinniittut atornerluinerannut katsorsaasarneq atuutsileqqullugu.
Lars-Emil Johansen isumaqarpoq kukkunerusoq eqqartuunneqarsimasut aamma pinerluuteqarsimasunut nunatsinni isertitsivinniittut atornerluinerminnut arlaannaannilluunniit katsorsarneqarnissamut neqerooruteqarfigineqartannginnerat
Lars-Emil Johansenip, Lars Barfoed qinnuigaa pineqartunut ministeritut akisussaasutut, Kalaallit Nunaanni eqqartuunneqarsimallutik pinerluuteqarsimasunullu isertitsivimiittunut, ilinniarsimasunik katsorsaasoqarneqarnissaannut periarfissiissasoq, imigassamik aamma ikiaroornartumik ajornartorsiuteqanerannut tunngatillugu.
- Neriuppunga illit qulakkiissagit piaarnerpaamik, eqqartuunneqarsimasunut Kalaallit Nunaanni pineqaatissinneqarsimallutik isertitsivinniittunut periarfissanik tamakkuninnga pingaaruteqarluinnartunik neqerooruteqarfigineqarnissaat, qulakkiiissagit.
- Tamanna piaarnerpaamik pippat, taava pilertornerusumik angusat pitsaalluinnartut Danmarkimi taamatut iliuseqarnitta kingunerisaanik takusinnaasavut, Kalaallit Nunaannut ingerlateqqissinnaavagut, Lars-Emil Johansen allappoq.
Innersuussutigisaa tassaavoq ukiut arlalialuit matuma siornatigut iluatsitani kalaallit qallunaat nunaanni paarnaarussat, ingammi Herstedvesterimiittut atornerluinerminnut katsorsarneqarnissaasa aningaasaliiffigineqarnissaa.
Aaqqissuussineq aningaasaliissutinit aalajangersimasunut atugassiaritinneqartunit aningaasalersorneqarpoq kiisalu kalaallit paarnaarussat imigassamik aamma ikiaroornartumik hashimik atornerluinerannik katsorsaanerit kalaallisut ingerlanneqarpoq katsorsaasartunit kalaallinit.
Aaqqissuussineq taanna maannakkut ukiuni arlaqartuni ingerlareerpoq iluatsilluartorujussuuvorlu, tamatumami maannamut kingunerereerpaa paarnaarussat atornerluinerminnik qaangiisimanerat, taamaattumillu nutaanik periarfissaqalerlutik aammattaaq paarnaarussaajunnaarnerminni inuiaqatigiinnut nalinginnaasumik inooqataasutut uteqqissinnaalerlutik.
Ajoraluartumik ungasinngitsukkut paasivara aaqqissuussineq tamanna Kalaallit Nunaanni atuutinngitsoq, Lars-Emil Johansen inatsisinut atuutsitsinermut ministerimut Lars Barfoedimut allappoq.