CIA-p misissuiffigineqarnissaa piumasaraa

Inatsisartut nunanut allanut isumannaatsuunermullu ataatsimiititaliaata CIA-mut tunngasup misissueqqissaarfigineqarnissaanik piumasaqaataa aviisip ullormut saqqummersartup Politikenip pingaarnerusumik allaaserisamigut taperserpaa

Arlaannut attuumassuteqanngitsunik misissuisitsinissamut naalakkersuisut isumartik suli qallunaat naalakkersuisuinut nalunaarutiginngilaat.

"Inuit pisinnaatitaaffiinik Kalaallit Nunaatalu namminersortuunerata innarlerneqannginnissaanik Danmarki pisortatigoortumik nakkutilliisuuvoq, tunuatigulli naalakkersuisut Kalaallit Nunaat Savalimmiullu atorsimavaat Washington D.C.-mi politikkikkut iluareqqusaarnermut".

Taamatut pingaarnerusutut allaaserisamini allappoq aviisi ullormut saqqummersartoq Politiken. Tassani aviisip pingaarnerusumik allattuata Folketingimi illua'tungiliuttut Inatsisartullu nunanut allanut isumannaatsuunermullu ataatsimiititaliaata CIA-p nunatta Danmarkillu silaannartaatigut tigusanik isertortumik assartuisarsimanerata arlaannut attuumassuteqanngitsumik misissuiffigineqarnissaanik piumasaqaataat taperserpaa.

"Marloqiusamik inissisimaneq atorsinnaajunnaarpoq. Piffissami naalakkersuisut tamaviaarlutik takutitsiniarfianni naalagaaffeqatigiinneq Qalasersuarmut atasoq, isumaqanngilluinnarpoq pisumi qissigusunnartumi tamatumani ersarilluinnartunik pilersitsiniartoqanngimmallunniit Arlaannut attuumassuteqanngitsumik misissuinissaq pisariaqartinneqarpoq qallunaat naalakkersuisuisa tatigineqarnerannik pilersitseqqittussamik", aviisimi pingaarnerutitami allassimavoq.

Naalakkersuisut arlaannut attuumassuteqanngitsumik misissuisitsinissamut isummaminnik suli qallunaat naalakkersuisuinut pisortatigoortumik nalunaaruteqanngillat.

Powered by Labrador CMS