CIAp timmisartuussisarneri aammalu

Timmisartut CIAp pigisai tigusanik angallassinernut akuerineqanngitsunut atorneqarsimannguatsiarput. Kalaallit Nunaannit aamma Savalimmiunit pisimasup misissoqquneqarpoq

Justus Hansen: - Pasillivunga danskit naalakkersuisuisa imaluunniit danskit oqartussaasuisa CIA akuerisimassagaat danskit silaannartaannik atuinissaannut. Assiliisoq: Leiff Josefsen

Inatsisartut partiit tamarmiullutik danskit naalakkersuisuisa, amerikamiut kilitsissiaasa CAIp danskit, kalaallit aamma savalimmiut silaannartaanik tigusanik timmisartuussillutik, atuisarsimanerannik misissuinissaat piumasaqaatigaat. Politiken søndag pisimasoq pillugu annertuumik aallaaserisaqarluni ilanngussivoq.

- Paasissutissat takkussuuttuartut tunngavigalugit pasillivunga danskit naalakkersuisuisa imaluunniit danskit oqartussaasuisa CIA akuerisimassagaat danskit silaannartaannik atuinissaannut, Justus Hansen, Demokraatit oqarpoq, Inatsisartut Nunanut Alllanut Sillimaniarnermullu Ataatsimiititaliaanni siulittaasoq, oqarpoq.

Kalaallit tungaannit taamatut qisuariatoqarpoq januaarimi Politikenimi oqaluttuarineqareersorlu, danskit naalakkersuisui 2008-mi CIAp timmisartuussisarneri isertuussat pillugit annertuumik misissuititsiniarlutik neriorsuiutigalutik, akunnerminni pisup nipangiunneqarnissaa anguniarsimagaat.

CIAp timmisartuutai, tigusanik angallassinermut atorneqartarsimasorineqartut, arlalippassuariarlutik Kalaallit Nunaanni mittarfinnut orsersoriartorlutik mittarsimapput Atlantikorsuaq qulaallugu siumut utimullu ingerlaartanerminni aammattaaq Danmarki kiisalu Savalimmiut qulaallugit ingerlaartarsimapput.

Savalimmiuni illuatungiliuttut ataasinngorpat aalajangiiffigisassamik siunnersuuteqarniarput, tamatumani aammattaaq piumasarineqarniarluni danskit naalakkersuisuisa arlaannaannulluunniit attuumassuteqanngitsunik misissuititsinissaat.

- Uagut qulaajartikkusupparput danskit naalakkersuisuisa qanoq annnertutigisumik ilisimasaqarsimanerat. Danskit naalakkersuisui arlaannaannulluunniit attuumassuteqanngitsumik misissuisoqarnissaanut naaggaassagaluarpata, taava aaqqiaagiinngissuteqalissaagut tamatumalu Danmarkip Kalaallit Nunaata aamma Savalimmiut akornanni pissutsit innarlissavai, Høgni Hoydal Namminiilivinniat partiianeersoq.

Kisianni danskit naalakkersuisuisa arlaannaannulluunniit attuumassuteqanngitsunik misissuititsinissaq itigartippaa, tamatumani innersuussutigalugu naalakkersuisut namminneq 2008-mi CIAp timmisartuussisarsorisimaneqarneri pillugit misissuisitsisimanertik.

- Misissuisitsinerup inernera tassaavoq qulaassilluni timmisartuussisarsimanerit danskit oqartussaasuisa ilisimasimanngikkaat, nunanut allanut ministeri Lene Espersen (k) oqarpoq,

/ritzau/

Powered by Labrador CMS