Politikerit nuimasut Alcoa ataatsimiissutigaat
Naalakkersuisunut ilaasortat pingasut Alcoap suliniutaata killiffianik Aluminiumik aatsitsivik pillugu Ataatsimiititaliaagallartoq paasissutississavaat
2011-mi upernaakkut ataatsimiinnermi sapaatip akunnerani siullermi Maniitsup eqqaani Alcoap suliniutaa inatsartut ataatsimiittarfianni oqallinnernik pilersitsereerpo, ataasinngornermilu nalunaaquttap 15.30 aamma 17.00 akornanni naalakkersuisut malinnaatitaasa amerlanerpaartaasa, siulittaasup Kuupik Kleistip kiisalu inuussutissarsiornermut aatsitassanullu naalakkersuisup Ove Karl Berthelsenip aamma ineqarnermut, atortorissaatinut angallannermullu naalakkersuisup Jens B. Frederiksenip suliniutip killiffia pillugu Kalaallit Nunaanni Aluminiumik aatsitsivik pillugu Ataatsimiititaliaagallartoq paasissutississavaat.
Februaarip naalernerani Kuupik Kleistip, Ove Karl Berthelsenip Jens B. Frederiksenillu, malinnaasoqatigiinni ilaasortat sisamaat nunami namminermi pissutsinut kiisalu pinngortitamut avatangiisinullu naalakkersuisoq Anthon Frederiksen peqatigalugu, Ottawami amerikarmiut selskabiat Alco ataatsimeeqatigaat aluminiumik suiniutip killiffia paasiniarlugu.
Ataatsimiinnermi Alcoap erseqqissarpaa Kalaallit Nunaanni aluminiumik aatsitsivimmik pilersitsinissamut pisariaqartoq suliniutip nunani tamalaani unammillersinnaanissaa. Kalaallit Nunaannili sanaartornermut aningaasartuutit nunanut allanut sanilliullugit qaffasippallaaqaat, taamaattumillu Alcoap piumasaraa suliniuterujussuaq erngup nukinganik nukissiorfik aluminiumillu aatsitsivik sulisartunit avataaneersunit sananeqassasoq, tamakkua akissarsiassaannik isumaqatigiissuteqarfigigallarlugit, SIK malillugu akissarsiat minnerpaaffiannik mikinerusumik.
– Alcoap suliniutaa tapersersorparput, tamannali ajunngitsunik atugassaqarluni pissaaq, SIK-p siulittaasua Sermitsiami tallimanngormat saqqummeresumi oqarpoq, taassumalu ersissutigaa Alcoa immikkut ittumik inatsisiliuunneqarpat tamanna Kalaallit Nunaanni sanaartugassarsuarni allani sulisartunik avataaneersunik sussaanngitsunik isumaqatigiissutilinnik ammaassasoq.
Justus: Alcoamut aap
Kalaallit Nunaanni alumiumik aatsitsivik pillugu ataatsimiititaliaaallartumi ilaasortaapput siulittaasoq Justus Hansen, Demokraatit, siulittaasup tullia Aqqluaq B. Egede, Inuit Ataqatigiit, kiisalu Knud Fleischer, Kattusseqatigiit Partiiat, Siumukkormiullu marluk Karl Lyberth aamma Akitsinnguaq Olsen.
Siulittaasoq Justus Hansen sermitsiaq.gl-imut oqarpoq nammineq - tassa ataatsimiititaliaanngitsup - isummani malillugu sulisartut avataaneersut, sanaartornermi immikkut atugassaqartinneqarlutik atorfinitsinneqartut, Kalaallit Nunaata akuersaartariaqarai.
– Kalaallit Nunaat aluminiumik aatsitsivilioruttulerlunilu piiaaffissuarnik pingasunik ammaanialerpoq, pisariaqartunillu sulisartoqanngilluinnarpugut, allaat sullissinerup iluani, Justus Hansen oqarpoq, akerlanillu pingaaruteqartutut isigaa sanaartornerup nalaani Kalaallit Nunaat praktikkernermi inissatigut sulisartut avataaneersut ilinniarfiginissaat, siunissami suliassat annertuut taamaattut nammineerluta kivissinnaajumallugit.