Karl Lyberth: Kuupik Kleist sallua
Karl Lyberthip innersuussutigaa Kuupik Kleistip oqaaseqarnera, IA-p Aningaasaqarnermut Ataatsimiititaliami ilaasotaatitaasa taaserneqaranni ataatsiminnermi peqataasimanani
Siumup Inatsisartuni ilaasortaata Karl Lyberthip Naalakkersuisut Siulittaasuat aamma IA-mut siulitaasuusoq Kuupik Kleist aperivaa, IA-p aningaasaqarnermut ataatsimiititaliaani ilaasortaatitaasut, tamatumunnga ilannguullugu ataatsimiititaliami siulitaasuusoq, IA-mit toqqarneqartussaasoq, taarserneqarnerannut tunngatillugu salluliornersoq.
Karl Lyberthip innersuussutigaa pingasunngornermi 2. marsi Kuupik Kleistip Radioaviisimi oqarsimanera, nammineq IA-p aningaasaqarnermut ilaasortaatitaasa taarsinneqarneranni ataatsimiinnermi peqataasimanani.
- Imatut paasillugu aningaasaqarnermut ataatsimiititaliami IA sinnerlugu ilaasortat taarserneqarnerat peqataaffigisimanagu aamma taamatullu pisoqarnera nalusimallugu, Karl Lyberth paasinnippoq aperillunilu:
- Qanoq ililluni partiimi siuttup, minnerunngitsumik Naalakkersuisunut siulittaasuutigisup, nalusinnaavaa ataatsimiititaliami taamatut pingaaruteqartigisumi partiip ilaasortaatitaasa taarserneqarnerat?
- Pingaartumik inuit pineqartup aappa siulittaasutut inissisimatillugu, tupigusulluni nangippoq
Karl Lyberth aperivoq: - Naalakkersuisut siulittaasua innuttaasunut sallulluni nassuiaava?
-Tupinnarluinnassaaq Hr. Kuupik Kleist pisumut pineqartumut ilisimasaqarsimanngippat, taamaattumik eqqarsaqqajaanarpoq Naalakkersuisunut siulittaasoq innuttaasunut ilumut eqqunngitsunik oqalunnersoq, naliliivoq.
Karl Lyberth isumaqarpoq, pisoq pinngitsoornani Hr. Kuupik Kleistip siuttutut ataqqinassusiata innarlerneqarujussuarneranik kinguneqartussaasoq nalunanngitsoq.
- Partiip iluani taamatut annertutigisumik pisoqarnera ilumut ilisimasimanngikkuniuk siuttuusimavoq sanngiitsoq, naqissusiivoq nangillunilu: - Pisussat ilisimasimagunigit nunatsinni innuttaasut eqqunngitsumik paasisitsivoq, siuttorlu innuttaasunut eqqunngitsunik paasisitsisoq ataqqineqarsinnaanngilaq, Karlu Lyberth oqarpoq.