SASimut ilaaneq akisunerulissaaq

Timmisartunut ilaasut orsussamut akigitinneqartut qaffakkiartuinnartut akilissavaat, SASip orsussamut tapiliut qaffaqqippaa

Danmarki uuliap akiata qaffakkiartuinnarnera maannakkut aammattaaq timmisartunut ilaasunut sunniuppoq. Asseq: Polfoto

Kiattunut Danmarki aqqusaarlugu SASip timmisartuinut ilaaniaraanni siornamut naleqqiullugu akisunerulingaatsiassaaq.

Kingullermik akinit qaffaanermit ullut 30-t qaangiutiinnartut SASip orsussamut bilitsit akiinut tapiliut timmisartuutileqatigiiffiup qaffaqqippaa, nutaarsiassanit allaaserinnittartoq Check-In allasserisaqarpoq.

Taamaalilluni nunami namminermi angalanermi aamma skandinaviami kiisalu europami angallavinni bilitsi siumut uterlugulu 22. marsi aallarnerfigalugu 75 koruuninik SASimi akisunerulissaaq. Ilaasut siumuinnaq angalaniartut 37 koruunit missaannik akileeqqissapput.

- Uuliamut akigitinneqartut qaffakkiartuinnarnerat pissutigalugu annertoorujussuarmik orsussamut aningaasartuutivut qaffapput.

- Sapaatit akunnerisa kingulliit ingerlanerini uuliamut akigitinneqartut 20 procentit sinnerlugit qaffapput. Pissutsit ingerlaavartumik nakkutiginiarpavut qanorlu pisoqarnera tunngavigalugu tapiliutit naleqqussartassavagut, SAS nalunaarpoq.

Danmarkimi tapiliut qaffaat kingulleq ilanngullugu katillugit 17 eromut qaffappoq, tassa ingerlaarnermut ataatsimut katillugit 127 koruuniuvoq. Norgemi tapiliut 19 euromut qaffappoq, Sverigemilu tapiliut 15 euromit 20 euromut kingullermik qaffaat ilanngullugu qaffappoq.

Europami angalanerni tapiliut katillugit 32 euromut qaffassaaq koruuninngorlugit tassaallutik 238 inerlaarnermut ataatsimut. Ungasinnerusunut angalanernut tapiliut allannguuteqanngilaq 857 koruuniulluni.

Timmisartut orsussaanut niuernermi akigitinneqartup maannakkut killiliussaq immikkut illuinnartoq qaangeqqammarpaa tassalu tonsimut 1000 dolarit. Tamaalilluni maannakkorpiaq akigitinneqartoq 1010 dolariulluni, tassa qaamatit aqqaneq marluinnaat matuma siornanit qaffariaat 50 provcentiulluni.

Tamatuma kingunerisaanik nunarsuaq tamakkerlugu timmisartuutileqatigiinnut immikkut aningaasartuutaassapput milliardit 42 dollarit (danskit aningaasanngorlugit 225 milliardit koruunit) 2011 tamaat eqqarsaatigalugu, uuliamut akigitinneqartut maannakkutut qaffasitsigiinnassappata.

Kisianni ilaasut akigitinneqartut ilaat akilissavaat. Kingullermik SASip orsussamut akigitinneqartunut tapiliut februaarip 22-ni qaffappaa bilitsinut akigitinneqartunut ilanngullugu uuliamut akigitineqartut qaffakkiartornerat pissutigalugu.

Ritzau taamatut allaaserisaqarpoq.

Powered by Labrador CMS