Sermersuumi ammanerunissaq
Februaarip aallaqqaataaniit kommunimi oqaluuserisassat imaqarniliallu nittartakkami saqqummersinneqartalissapput, taamaalillutik innuttaasut kommunip sulineranik malinnaasinnaallutik.
Kommuneqarfik Sermersooq ataatsimiititaliami sulinermut atatillugu ammanerusumik periuseqalissaaq, kommuni tusagassiuutitigut nalunaarummi allappoq, attaveqatigiinnerup silarsuaani oqaaseq nutaaq atorneqalissalluni tassalu ammaneruneq. Ammasumik pissuseqarnermik taarusupparput.
Kommuneqarfik Sermersuumi kommunalbestyrelsemi aalajangerneqarpoq februaarip aallaqqaataaniit 2011 ammanerusumik pissuseqartoqaalissasoq.
Februaarip aallaqaataaniit 2011 aamma periarfissaalissaaq aningaasaqarnermut ataatsimiititaliami ataatsimiititalianilu ataavartuni oqaluuserisassat imaqarniliallu www.sermersooq.gl-mi takuneqarsinnaalernissaat. Tusagassiuutitigulli nalunaarummi ammanerunissaq qanoq paasisariaqarnersoq nassuiarneqanngilaq.
Borgmesteri Asii Chemnitz Narup allappoq:
- Kommunalbestyrelsemi naalakkersuinikkut taama sulinuteqarnermi kissatigineqarpoq kommunimi naalakkersuinermi sulinermi ammanerusumik akimullu ersinnerusumik pissuseqalernissamik. Qinigaasugut kissaatigaarput innuttaasut paasitinneqarnissaminnut periarfissaqarnissaat minnerunngitsumik inuiaqatigiinni ajornartorsiutini tamat oqartussaaqataanerisa aqqani oqallinnerni sunniuteqarsinnaassallutik.
Ammanerunissamik aalajangiineq innuttaasunut kiffartuussinerunermut takussutissaavoq, tassaavorlu naalakkersuinikkut suliniut inatsisitigut piumasaqaataasunit annertunerusoq, allassimavoq.
Ammanerunikkut innuttaasut kommunalbestyrelsemi sulinermi malinnaasinnaalissapput, neriuutigineqarporlu taamaaliornikkut paasinninnerullutik pitsaanerusumillu oqalliseqataallutik, kommunimi nalilerneqarpoq.