Perput kaffillerpoq
Kalaallit ornittagaat "Perput" Aalborgip qeqqani ininut nutaanut iserterpoq.
Ukiuni arfineq marlunni Vejgård Torvimeereerluni kalaallit ornittagaat ”Perput” Aalborg Midtbymiilerpoq, taamaattumillu kalaallisut kaffillissalluni Boulevarden 1A -mi (Skipper Clements Gade) ataasinngorpat januaarip 31-ani marluniit sisamanut. Kikkut tamarmik tikilluaqqusaapput.
Danmarkimi naalakkersuisut immikkut ittumik iliuuseqarneranni Danmarkip avannaani kalaallinut tamanut ukiortaami tunissutaavoq qujanartoq, taamaalilluni Perput suli ukiuni marlunni ingerlasinnaassalluni, ukiarmimi sipaarniartoqarneratigut matusaanissaminut ulorianartorsiorsimavoq. Aningaasaliisoqaqqinneratigut Aalborgimi Kalaallit Illuutaata 'Perpumik' ingerlatsisup aalajangerpaa nutarteriniarluni illoqarfiullu qeqqani ininut nutaaliaasunut iserternissamut piffissanngortoq. Taamaaliornikkut ornittakkamik atuisut pitsaanerusumik ornittagaqalerput, atuisut amerlisinnaallutik, isumaginninnikkut siunnersorti Robert Kreutzmann tusagassiuutitigut nalunaarummi allappoq.
Pitsassuarmimmi inissisimalerpugut. Ukiup aallartinneraniit atuisut amerlisimapput assigiinngisitaarnerulerlutik. Tamanna ilaatigut takuneqarsinnaavoq kalaallit ajornartorsiuteqartut kisimik takkuttarnatik, atuisoqalerpugulli nunap immikkoortuani ungasissumiit takkullutik nuannisaqataajartortunik. Tamakku tamarmik ”Perpumut” pitsaasuupput, Robert Kreutzmann isumaqarpoq.
Ukiortaap kingorna ammarattali atuisut nammineerlutik ”Perput” aaqqissuuppaat, ullunilu makkunani kaffillernissaq piareersaleruttorlugu, Robert Kreutzmann allappoq, kaffillertoqarneranilu amerlasuut takkunnissaat neriuutigalugu.
- Nutaarsiassaq siammarusupparput, Perpumimi atuisut ornittagartik nutaaq nittarsaakkusuppaat, oqarpoq.