Atoqatigiinneq peqqissoq
Inuulluataarnerup sulinera sinerissami sumiiffinni assigiinngitsuni peqqissumik atoqatigiinneq inuusuttunut ilinniartitsissutigineqassaaq.
Sumiiffinni assigiinngitsuni inuusuttunik peqqissumik atoqatigiinnermik ilinniartitsisussat atorfinitsinneranni januaarip 22-aniit 25-anut 2011 Ilimmarfimmi ilinniartitaanermut isumasioqatigiittoqarpoq Uummannamiit, Paamiuniit, Nanortalimmiit Maniitsumiillu peqataasoqarluni. Iloqqortoormiuniit peqataasussaq silap ajorneratigut ajoraluartumik peqataanngilaq, taannali sapaatip akunnerani tullermi ilinniartinneqassaaq, Inuulluataarnermiit tusasassiuutitigut nalunaarummi allassimavoq.
Suliniutaavoq tamatigoortoq tassaalluni ilinniartitsinerullunilu ilisimatusarneq, ilaatigut inuusuttut peqqissumik atoqateqarnissamut ilinniartinneqarlutik ilaatigut aamma inuusuttut atoqateqariaasiat ilisimatusaatigineqarluni.
Isumasioqatigiinnermi peqataasut ileqqorissaarnermik ilinniartinneqarput, nunatsinni atoqatigiinnikkut peqqissutsimik, inuusuttunik ilinniartitsinermik qarasaasiamillu atuinermik. Ilinniartitsinerup saniatigut sinerissami sumiiffinni suliniut qanoq ingerlanneqarsinnaanersoq pilersaarusiorlugu aallartippaat, ilinniusiorlutillu.
”Isumasioqatigiinnermi pissarsiatta ilagaat inuusuttut pisuusaartitsillutik isiginnaartitsinissaannut atortussaat, tassani inuusuttut usuup puuata atornissaata pingaassusaa paasillugu”, Karoline Rosing Olsen Maniitsumeersoq oqarpoq.
Siunissami Inuulluataarnerup ilisimatusarnera Uummannami, Paamiuni Illoqqortoormiunilu ingerlanneqassaaq sumiiffinni siunnersuisoqatigiinnik pilersitsisoqassalluni illoqarfinni suliniummik naleqqussaassallutik.
Aamma Maniitsumi Nanortalimmilu aaqqissuussisoqassaaq.
Tassaavoq nunatsinni innuttaasut peqqissusaat pillugu ilisimatusarnermi suliniut siullermeertoq, tassani inuusuttut 15-niit 19-inut ukiullit atoqatigiinnikkut peqqissusaat sammineqarluni, Inuulluataarneq nammineq isumaqarpoq.
Suliniut Inuulluataarneq 2010-mi aallartippoq peqqissutsimik ilisimatusarnerulluni sumiiffinni aallaaveqartoq. Suliummi tunngaviuvoq nassuerutigineqarmat iluatsittumik angusaqassagaanni pitsaanerpaasartoq sumiiffinni ataasiakkaani sorlaqartumik sulineq. Taamaattumik suleqatigisat Inuulluataarnerullu nuna tamakkerlugu siunnersuisoqatigiivi sumiiffinnik ataasiakaanik qanittumik suleqateqarput najukkaminni namminerisaminnik ingerlatsisunik nalilersuisartunillu.
Suliniut National Science Foundationimit USA-miittumit tapiiffigineqarpoq tassaavorlu Ilisimatusarfiip – Grønlands Universitet, Montana State Universityp USA-miittup kiisalu University of Torontop Canadamiittup suleqatigiillutik ilisimatusaataat.