Nunarsuarmut saqqumilaarfik
TV-kut aallakaatitassiat "A Taste Of Greenland" nunarpassuarnut tunineqareersimalerput - Nuummi ataatsimiinnissamut aningaasaleerusuttut sapaatip akunnerani tullermi qaaqqusaapput
Aallakaatitassiat New Zealandimi, Spaniami, Tjekkiami, Ungarnimi, Polenimi, Finlandimi, Ruslandimi tv-qarfinnut kiisalu USA-mi tv-qarfinnut ruslandimiusut oqaasilinnut tunineqareersimalerput. Taassuma saniatigut tv-qarfiit 30-it ilanngunneqassapput maannakkut tv-kut aallakaatitassianik misissuisut.
Allatut oqaatigalugu nunatsinni takornariaqarnermut inuutissarsiornermullu siunnersuisooqatigiit tv-kut iganermik aallakaatitassiaat ”A Taste Of Greenland” soqutigineqartupilussuupput, nerisassat aallaavigalugit nunatsinni nunat immikkoortuisa assigiinngissutai aallaavigineqarlutik.
Ukioq manna filmiliornerit Arctic Circle Regionimut Nuummullu anngussimalerput, tassungalu atatillugu Kommuneqarfik Sermersooq marlunngornermi Katuami ataatsimeersuarnissamut qaaqqusivoq 19-miit 21-mut. Tassaassaaq aningaasaleerusussinnaasunut ataatsimiinneq ”A Taste Of Greenlandimi” nittarsaanneqarusuttut, taamaalillutik oqariartuutitik nunarsuup sinneranut apuussinnaallugit.
Soqutiginnittut arlalitsigut peqataasinnaaput. Soorlu nerisassiassanut igaassanik tunisinikkut, igasup Chris Coubroughip igaassaanik. Aamma angallammik allatigullu assartuinermik aningaasaliisoqarsinnaavoq. Igasummi taamaallaat nunatsinni igaassat atussanngilai. Aamma igaassaminik piniarlunilu pisarniassaaq.
Aningaasaliisuugaanni akeqanngitsumik nittarsaanneqarnerup saniatigut filmiliortut illoqarfimmiinnerisigut asserpassuarnik assiliisitsisoqarsinnaavoq aallatigulluunni. Namminerisamik filmiliat kingusinnerusukkut takornariaqarnikkut nittartagassamut ikineqarumaarput.
Filmiliaq Destination East Greenlandimit aallartinneqarsimavoq. Nunatsinni nerisassiassarpassuit immikkorluinnaq ittut pinngortitarlu alutornarluinnartoq neqitarineqassapput, aammali nunatsinni nunap immikkoortuini oqaluttuarisaaneq oqaluttuarineqassalluni, inuutissarsiutit allallu, taamaalilluni nunarput tamatigoortumik ussassaarutigineqarluni.
Tv-kut iganermik aallataatitassiat tassaassapput aallakaatitassiat immikkoortut, taakkulu Tunumi, kitaani, avannaani kujataanilu immiunneqassapput.
Nerisassat aallaavigalugit tv-kut aallakaatitassiat qangali nunarsuarmi tv-qarfinni nuannarineqartupilussuupput. Aammali aallakaatitassiat piffissami sivisuumi atasinnaapput. Nerisassiornikkut aallakaatitassiat immiunneqarnerminniit ukiut arfineq pingasut qulilluunniit kingorna allaat takutineqarajuttarput.
”A Taste Of Greenland” Danmarkimit filmiliortartunit Ace&Acemit suliarineqarpoq, taakkulu ukiorpassuarni piviusulikkersaarusiornermik misilittagaqarput. Aamma iluatsinneqarsimavoq Tuluit nunaanni tv-kut aallakaatitassianik tuniniaallaqqissumik isumaqatigiissusiornissaq, nunarsuarmi tamarmi tv-qarfinnik attaveqartumik.