Kuluusuup ukiuni 100 saqqummersippai
Nuummi Katuami Kulusummi meeqaat suliaat saqqummersinneqarput, taakkunani sammineqarput, qanga, siunissaq aamma ullutsinni
Kulusuk 2009-mi ukiunik 100-nngortorsiorluni nalliuttorsiorpoq. Tamanna ilaatigut malunnartinneqarpoq saqqummersitsinikkut nunaqarfiup meerartaasa suliaannik taaguuteqartumik 100 - KULUSUK - 100.
Leise Johnsen, ullumikkut NAPA-mi pisortaasoq saqqummersitsinermik aallarniisuuvoq aamma suliniummi aqutsisuulluni tamanna isinnaartitsinermi tunuliaqusiortartoq Annika Nilsson suleqatigalugu ingerlanneqarpoq.
- Uagut sungiutiinnarsimavarput immikkut ilisimasalinnit, Kalaallit Nunaata kulturikkut oqaluttuarisaanera inuunerullu atugaanera, oqaluttuarineqartarnera. Suliniut manna tassaavoq meeqqat nammineertillugit nassaarsiortillugu namminneq aamma siuaasamik oqaluttuassartaannik oqaluttuartitsiniarneq, tusagassiuutitigut nalunaarummi allappoq.
Imaritinneqartoq aamma 100 - KULUSUK - 100-mi oqariartuutigineqartoq apriilimi 2009-mi Kulusummi atuarfimmi suliaqaatigaluni isumasioqatigiinnermi sapaatit akunnerat ataaseq ingerlanneqartumi pilersinneqarput. Suliat naammassisat nalliuttorsiornermut ilaatillugit nalliuttorsioqatigiinnermi aggustimi ivertinneqarput.
Uani sapaatit akunneranni meeqqat tallimat Katuami saqqummersitsinerup ikkussuunneqarnerani peqataallutik aallartittussaagaluarput, kisianni Kulusummi anorersuarnera pissutigalugu timmisartoq ilaaffissaat taamaatiinnarneqarpoq. Neriuutigineqarpoq sapaatit akunneranni matumani pingasunngornikkut tikikkumaartut, kiisalu saqqummersitsinissamut sunniuteqaatigisassatit iluatsillugit. Sisamanngornermi februaarip 3-anni nalunaaqutaq 16 borgmester Asii Chemnitz Narup peqatigalugu saqqummersitsineq ammassallugu.
100-KULUSUK-100 Katuami takuneqarsinnaavoq 4. februaarimit - 24. februaarimut.