Isumaginninnikkut aningaasartuutit annertusiartortut
Isertitaasussaagaluanut taarsiissutitut ikiuutitut aningaasartuutit Nunatsinni annertusiartorput, kisianni inuit ikiuutinik pisartagallit taamatulli amerliartornatik
Kalaallit Nunaanni Naatsorsueqqissaartarfimmit saqqummersinneqaqqarmersumi 'Isumaginninnikkut ikiuutinik pisartagallit 2009' tamanna takuneqarsinnaavoq.
Kisitsisit isumaginninnermut tunngasut 2009 takutippaat isertitaasussaagaluanut taarsiullugit ikiuutit: pisortanit ikiorsiissutit, sulinngeqanngikkallarnermi ikiorsiissutit, erninermi ullormusiat, siusinaarluni soraarnerussutisianik utoqqalernermilu soraarnerussutisianik pisartagalinnut aningaasartuutit annertusipput.
Tamatumani malunnaateqarneruvoq utoqqalinermi soraarussutisianut aningaasartuutit, taakku 2007-imiilli 17,1 procentinik annertusisimapput. Utoqqalinermi soraarnerussutisianut tunngaviusoq 2007-imi qaffanneqarpoq, tamatumunngalu ilutigitillugu aalajangerneqarpoq pisartagaritinneqartut siunissami akit qaffakkiartortarnerat tunngavigalugu iluarsiiffigineqartalernissaat.
- Utoqqalillutik soraarnerussutisiallik 2007-ip kingorna 1,7 procentinik ikilipput ilaatigut tamatumunnga pissutaavoq, utoqqalilluni soraarnerussutisiaqalertarnermi aallartiffissatut ukioqqortussuseq 2009-mit 63-init 64-inik ukioqalernissamut sivitsorneqarmat.
- Piffissami 2005-imit 2009-mut inuit 17.000-it sinnerlugit amerlassuseqartut ikiuutisianik assigiinngitsunik ataatsinik amerlanernilluunniit pisartagaqarput. Tamatuma assigaa, inuit Kalaallit Nunaanni najugaqartut 15-inulli sinnerlugit ukiullit akornanni, inuit quliugaangata sisamangajaat pisartaqarsimallutik. Taamak Kalaallit Nunaanni Naatsorsueqqissaartarfik nalunaaruteqarpoq.