Suliumajunnaarnerup Kastrup matuaa
Mittarfimmi sulisartut Københavns Lufthavn, Kastrupimiittoq sisamanngonermi nalunaaquttap akunnerini marlunnii matuniarpaat, modkraft.dk allaaserisaqarpoq
Kastrupimik Københavnip mittarfia nalunaaqutaq 10.30 aamma 12.00-ip akornanni sisamanngorpat mittarfimmi sulisartut iliuuseqarnermikkut matuniarpaat.
Taamatut allaaserisaqarpoq nittartagaq saamerliunianik ingerlanneqartoq modkraft.dk. Nittartakkami sulisut ilaat innersuussutigineqarpoq tusarfik kinaassutsiminik isertuussisoq, taamatuttaaq iliuuseqarniartut allagartaq agguaanniagaat.
- Naalakkersuisut siusinnaartumik suliunnaarsinnaanermi akissarsiassat 'efterløn' peerniarpaat, kisianni taannaannaanngilaq soorlu iluliarsuup annikinnersaa immap qaavaniittartoq. Ukiuni kingullerni qulini naalakkersuisut timmisartoqarfinni sulisunut tulleriaaginnarnik annikillisaaqattaarput. Maannakkut oqartariaqarpugut tamanna naammaleqaaq, allagartami agguaassami atsiorneqanngitsumi taamatut allassimasoqarpoq.
Iliuuseqartut taagugaat tassaapput efterløn, suliffissaaleqinermi ukiuni marluinnarni ullormusiaqarsinnaaneq aammattaaq Købnehavnip mittarfiani pissutsit suliffimmut namminermut tunngasut. Iliuuseqartut tunngavigalugit ukioq manna ukiuunerani inuit ikinnerpaamik 40-t nakkarlutik ajoqusersimapput.
Iliuuseqartut allagartami agguaassaminni allapput mittarfiup piginnittui, Australiamiut suliffeqarfiutaat Macquarie, sinneqartoorutinik iluarnaarniapiluinnartuusoq kisiannili ajoqusersinnaaneq pinngitsoortinniarlugu aningaasaliissuteqartarnani.
Mittarfiup tusagassiornermi pisortaata Søren Hedegaard Nielsenip, modkraft.dk-imut ilisimatitsissutigaa Delta Airlinesip sisamanngorneq ullup qeqqanut New Yorkimut aallarnissaraluani unitsikkaa.
- Iliuuseqarneq annertuneruniarpat uagut unitsinniarlugu qanoq iliuuseqarsinnaanngilagut. Uagut taamaallaat mittarfiup ingerlatsiinnarneqarnissaa misilissinnaavarput. oqarpoq.
Air Greenland sisamanngornermi pisunik eqqorneqanngilaq, timmisartuutileqatigiiffik nalunaarpoq.