Nunatta affaa aakkiartornermik eqqorneqarpoq
Kiannerpaaffiup 2010-p kingunerisaanik sermersuup annertuumik aakkiartornerata nammineerluni sakkortusiartornissaa annilaangatigineqarpoq
Upernaaq sermersuarmi sermip aatsitilernera ukiunik 40-nik matuma siornamut naleqqiullugu ullunik 40-nik siusinneruvoq ukiakkullu uninnera ullunik 30-nik kingusinnerulluni.
Tamatumunnga nassuiaataavoq siorna aasaanerani sermersuup annertussusia tamakkerlugu 52 procentia, katillugu 950.000 kvadratkilometerit aakkiartornermik eqqorneqarpoq, aviisi ullormut saqqummersartoq Information allaaserisaqarpoq.
Uuttortaasarnerli aallartimmat taamaattoqarnera aatsaat taamak annertugigaaq kiisalu 1972-imut sanilliullugu marloriaataalluni.
Tamakku Kalaallit Nunaanni ilisimatusarnikkut misissuinerit nutaat ersersippaat, sisamanngorpat danskip issittup silaannaanik ilisimatusarnermik ingerlataqarput, Sebastian H. Mernildip, Los Alamos National Laboratoriesimeersup Coloradomi ilisimatusarnermik suliallit ataatsimiinneranni saqqumiunnigaani.
Kalaallit Nunaanni ukioq 2010 immikkut illuinnartumik kiappoq, danskeq ilisimatusarnermik sulialik Informationimut oqarpq.
Ilisimatusarnermik sulialittut allatuulli sermersuup aakkiartornerata sukkatsikkiartuinnarnera assorsuaq eqqasuutigaa, minnerunngitsumik malunnarsorinarmat tamanna isummaminik annertusiartortoq.
- 2007-imi aakkiartorneq rekortiliivoq kiisalu 2010-mi aamma taamaaqqilluni. Kisitsisinik rekortiliinernik takusaqartarnerput siusinnerusumut naleqqiullugu akulikilliartorpoq, kiisalu ukiuni qulikkuutaartuni kingullerni pingasuni-sisamani uuttortaasarnerni paasissutissat pissarsiarineqartut allanngorarnerat annertuneruvoq aamma immikkut illuinnartunik siusinnerusumut naleqqiussilluni annertusseqartarlutik, Sabastian ernild oqarpoq.
Norgemi Tromsømi ingerlanneqaqqarmmertumi nunarsuaq tamakkerlugu peqataaffigineqartumi Issittumi kissatsikkiartornera pillugu isumasioqatigiinnermi, ilisimatusarnermik suliallit arlallit ersersippaat ernummatigalugu pisut 'tipping point'-imut killissimasut, tassa imaappoq pisut killiffiat imaaleriaannaasoq sukkasuumik, immikkut malunnaatilimmi aamma aktunngitsumik utertinneqarsinnaanngitsumik allanngortoqarataannaasoq.