Aningaasaateqarfik nutaaq meeqqanik, inuusuttunikilaqutariinnillu ikiuisussaq
Aningaasaateqarfeeraq IKIOQATIGIITTA pilersinneqarpoq. Aningaasaateqarfiup siunertaraa Kalaallit Nunaat tamakkerlugu meeqqanut inuusuttunullu taakkulu ilaqutaannut pilersaarutinut iluaqutaasunut annikitsunut angisuunullu tapersiisarnissaq
Aningaasaateqarfik Ikioqatigiitta qinnuteqarfigineqarsinnaanngorpoq.
Aningaasaateqarfeeqqamit ukiumut pingasoriarluni agguaassisoqartassaaq, ukiunilu marlunni aningaasat 10.000 kr.-iniit 200.000 kr.-inut qinnutigineqarsinnaallutik. Aningaasaateqarfeeqqamit aningaasat katillugit 2 million koruunit ukiuni tulliuttuni marlunni agguaanneqassapput. Qinnuteqarnissamut siullermut killiliussaq tassaavoq 15. marts 2011.
Aningaasassaaleqineq imaluunniit tapiissuteqarsinnaanermut nalornineq pissutigalugit isumaginninnikkut suliniutit pitsaasut akulikippallaartumik unitsinneqartarput. Isumassarsiat taakku inunnit piumassusilinnit suleqatigiiffinniillu piviusunngortinneqarnissaannik aningaasaateqarfeeraq qulakkeerinneqataassaaq. Isumaginninnermut Nalakkersuisoqarfiup aamma aningaasaateqarfiit Villum fonden aamma Oak Foundationip akornanni suleqatigiittoqarneratigut aningaasaateqarfeeraq pilersinneqarpoq.
Aningaasaateqarfeeraq siulersuisunit Kalaallit Nunaanni isumaginninnermik ingerlatsisuniit, inuussutissarsiortuniit, kommuniniit aamma ngo-nit sinniisoqartumit aqunneqassaaq. Siulersuisut taakku, ataasinngorneq januaarip 31-anni inissititertut, qinnuteqaatinik ingerlaavartumik nalilersuisassapput, suliniutillu suut tapiiffigineqassanersut aalajangiiffigisarlugit. Aningaasaateqarfeeqqamit aningaasanik ulluni qaninnerpaani qinnuteqartoqalersinnaassaaq.
Aningaasaateqarfeeqqap siunertaa tassaavoq meeqqat, inuusuttut ilaqutariillu atugaannik pitsaanerulersitsisinnaasunik suliniutinik tapersersuinissaq. Taamaattumik suliniutinik toqqaaniarnermi meeqqat inuusuttullu ingerlanniakkani peqataatinneqartarnissaat pingaartinneqassaaq, taamaalillunilu taakku ineriartornissamut periarfissaannik tapersersuisoqataallutik. Taamatuttarlu meeqqat ilaqutariillu nunami tamarmi suliniutinit iluaquserneqarnissaat isiginiarneqartussaavoq.
Inuit ataasiakkaat eqeersimaartut imaluunniit inuit suleqatigiit amerlanngitsut pissarsitinnissaat salliutinneqassaaq, aamma piffissami sivikitsumi sivisuumillu suliniutit eqqarsaatigineqassallutik.
Aningaasaateqarfeeqqap uummaarissup eqaatsumillu suleriuseqartup sunniuteqarnissaanut siulersuisut annertuumik neriuuteqarput. Suliniutit soorunami inernilerniagaqarlutillu anguniagaqartuussapput, aningaasaliissutissanillu qinnuteqarnissamut takisuunik allakkiornissaq imaluunniit pisariusunik nalunaarusiornissaq pisariaqartinneqanngilaq. Inuit suli amerlanerusut meeqqanut, inuusuttunut ilaqutariinnullu allanngueqataanissaannut tamatuma kinguneqarnissaa neriuutigineqarpoq.
Qinnuteqarnissamut periarfissat sukumiinerusut paasiniarlugit pissarsiariniarlugillu saffiginnittoqassaaq uunga:
Isumaginninnermut Naalakkersuisoqarfik
Suliniummi aqutsisoq Dora Kleist
Postboks 260, 3900 Nuuk
Telefon 34 66 66
E-mail: dokl@nanoq.gl
Qinnuteqaateqarnissamut immersugassaq ingerlaqqiffissami aaneqarsinnaavoq uani:
http://dk.nanoq.gl/Emner/Landsstyre/Departementer/Departement_for_sociale_anliggender/Micropuljefonden.aspx